काठमाडौँ । सोमबार देशका अधिकांश भू-भागमा आंशिकदेखि साधारणतया बदली रही हिमाली तथा पहाडी क्षेत्रका केही स्थानमा मध्यम वर्षा तथा हिमपातको सम्भावना रहेको छ। कोशी, बागमती, गण्डकी र लुम्बिनी प्रदेशका साथै कर्णाली र सुदूरपश्चिमका पहाडी क्षेत्रमा साधारणतया बदली रहने आकलन गरिएको छ।
दिउँसोको समयमा कोशी, बागमती, गण्डकी र लुम्बिनी प्रदेशका हिमाली तथा पहाडी भू-भागका थोरै स्थानहरूमा मध्यम वर्षा तथा हिमपात हुन सक्नेछ। यसैगरी कर्णाली र सुदूरपश्चिम प्रदेशको हिमाली भेगका एक-दुई स्थानमा हल्का वर्षा र हिमपात तथा मधेश प्रदेशलगायत विभिन्न प्रदेशका तराई भू-भागमा मध्यमसम्मको वर्षा हुने आकलन छ।
रातिको समयमा कोशी, मधेश, बागमती, गण्डकी, लुम्बिनी र सुदूरपश्चिम प्रदेशका पहाडी तथा तराई भू-भागमा साधारणतया बदली रहनेछ। मधेश, कोशी, बागमती र गण्डकी प्रदेशका तराई क्षेत्रका थोरै स्थानहरूमा तथा लुम्बिनी र सुदूरपश्चिम प्रदेशको तराई क्षेत्रमा मध्यम वर्षाको सम्भावना रहेकाले आवश्यक सतर्कता अपनाउन आग्रह गरिएको छ।
