काठमाडाैं । बङ्गलादेशकी पहिलो महिला प्रधानमन्त्री खालिदा जियाको निधन भएको छ। लामो समयदेखि बिरामी रहेकी ८० वर्षीया जियाको राजधानी ढाका स्थित एक अस्पतालमा उपचारका क्रममा निधन भएको हो।
मंगलबार जारी विज्ञप्तिमा बङ्गलादेश नेसनलिस्ट पार्टी (बीएनपी) ले खालिदा जियाको स्थानीय समयअनुसार बिहान ६ बजे निधन भएको जनाएको छ। चिकित्सकहरूका अनुसार उनको स्वास्थ्य अवस्था सोमबारदेखि नै अत्यन्तै गम्भीर बनेको थियो। उमेर र समग्र स्वास्थ्य कमजोर भएकाले एकैपटक धेरै उपचार सम्भव नभएपछि उनलाई जीवनरक्षक प्रणाली (लाइफ सपोर्ट) मा राखिएको थियो।
खालिदा जिया सन् १९९१ मा २० वर्षपछि सम्पन्न बङ्गलादेशको पहिलो लोकतान्त्रिक निर्वाचनमा बीएनपीलाई विजय गराउँदै देशकी पहिलो महिला प्रधानमन्त्री बनेकी थिइन्। उनी सन् १९९६ मा छोटो अवधिका लागि र पुनः सन् २००१ देखि २००६ सम्म प्रधानमन्त्रीको जिम्मेवारीमा रहेकी थिइन्।
उनको राजनीतिक जीवन बङ्गलादेशको राजनीतिमा दशकौँसम्म प्रभावशाली रह्यो।
