काठमाडौँ । मध्यपूर्वमा बढ्दो सैन्य तनावका बिच अमेरिकाले इरानमाथि लगातार नवौँ रात हवाई आक्रमण गरेको छ। उत्तरी इराकमा एक अमेरिकी सैनिकको मृत्यु भएपछि आक्रामक बनेको अमेरिकी सेनाले इरानभित्रका महत्त्वपूर्ण सैन्य अखडाहरूलाई निशाना बनाएको हो।
अमेरिकी सेनाको सेन्ट्रल कमाण्ड (सेन्टकम) का अनुसार पछिल्लो आक्रमणमा इरानी सेनाका कमाण्ड सेन्टर, हवाई प्रतिरक्षा प्रणाली, तटीय निगरानी स्थल, क्षेप्यास्त्र तथा ड्रोन प्रक्षेपण केन्द्र र सञ्चार सञ्जालहरूमाथि कडा प्रहार गरिएको छ। स्ट्रेट अफ होर्मुज जलमार्ग हुँदै यात्रा गर्ने व्यावसायिक पानीजहाज र नाविकहरूमाथि इरानले गर्दै आएको अवरोध तथा आक्रमण गर्ने क्षमतालाई निस्तेज पार्न यो सैन्य कारबाही गरिएको अमेरिकी सेनाले स्पष्ट पारेको छ।
यता, इरानले पनि अमेरिकी आक्रमणको कडा जवाफ दिइरहेको दाबी गरेको छ। इरानको इस्लामिक रिभोलुसनरी गार्ड कर्प्स (आईआरजीसी) ले पश्चिमी इरानमा एक अत्याधुनिक अमेरिकी एमक्यु-९ (MQ-9) ड्रोन खसालेको र जोर्डनस्थित अकाबा विमानस्थलमा रहेका अमेरिकी सैन्य विमानहरूमाथि ब्यालेस्टिक मिसाइल प्रहार गरेको जनाएको छ। साथै, स्ट्रेट अफ होर्मुजलाई पूर्ण रूपमा असुरक्षित घोषणा गर्दै इरानले त्यहाँ अमेरिकी दबाबमा अघि बढ्न खोजेका तेल ट्याङ्करहरूमाथि कारबाही गरेको बताएको छ।
यसैबिच, इरानका विदेशमन्त्री अब्बास अराघचीले रणभूमिमा आफ्नो सैन्य उपस्थिति बलियो र रणनीतिक रूपमा सफल नभएसम्म अमेरिकासँग कुनै प्रकारको वार्ता नहुने स्पष्ट पारेका छन्। दुई देशबिच बढ्दो सैन्य भिडन्त र इरानी प्रत्याक्रमणको जोखिमलाई मध्यनजर गर्दै बहराइनलगायतका क्षेत्रमा रहेका अमेरिकी नागरिकहरूलाई उच्च सतर्कता अपनाउन अमेरिकी दूतावासले निर्देशन दिएको छ।
