काठमाडौँ । बिहीबार सम्पन्न प्रतिनिधिसभा निर्वाचन–२०८२ को मतगणना देशका विभिन्न भागमा धमाधम अघि बढिरहेको छ। दुर्गम क्षेत्रका मतपेटिका संकलनमा भइरहेको ढिलाइका कारण केही स्थानमा मतगणना सुरु हुन बाँकी रहे पनि काठमाडौँ उपत्यकासहित देशका अन्य प्रमुख सहरहरूमा गणना जारी छ।
प्राप्त पछिल्लो प्रारम्भिक परिणामअनुसार, राष्ट्रिय स्वतन्त्र पार्टी (रास्वपा) ले आफ्नो प्रभाव विस्तार गर्दै विभिन्न निर्वाचन क्षेत्रमा अग्रता कायम राखेको छ। काठमाडौँका १, ४, ५, ७, ८ र १० तथा काठमाडौँ क्षेत्र नं ३ मा समेत प्रतिस्पर्धा रोचक देखिएको छ। साथै, रास्वपाले कास्की र बाँकेका केही क्षेत्रमा पनि सुरुवाती अग्रता लिएको छ। भक्तपुर–२ र बाँके–२ मा भने नेकपा एमालेले अग्रता कायम गरेको विवरण प्राप्त भएको छ।
गणना जारी रहेकाले प्रारम्भिक नतिजामा निरन्तर फेरबदल भइरहेको छ। निर्वाचन आयोगले सर्वदलीय बैठकपछि मात्रै गणना सुरु गर्ने व्यवस्था मिलाएकाले केही ढिलाइ भए पनि मतगणना प्रक्रियालाई व्यवस्थित बनाइएको जनाएको छ।
