काठमाडौँ । नेपाली कांग्रेसले प्रतिनिधि सभाको समानुपातिकतर्फका सांसदहरूको नामावली टुङ्गो लगाउन केन्द्रीय कार्यसम्पादन समितिको बैठक बोलाएको छ। पार्टी केन्द्रीय कार्यालयले जारी गरेको सूचनाअनुसार आगामी आइतबार दिउँसो १ बजे ललितपुरको बीपी नगरस्थित केन्द्रीय कार्यालयमा बैठक बस्ने तय भएको हो।
यस बैठकको मुख्य एजेन्डा निर्वाचन आयोगमा बुझाउने समानुपातिक सांसदहरूको अन्तिम नाम छनोट गर्नु रहेको छ। निर्वाचन आयोगले दलहरूलाई प्राप्त सिट सङ्ख्याका आधारमा बन्दसूचीबाट उम्मेदवारहरूको नाम सिफारिस गर्न समयसीमा दिएसँगै कांग्रेसले आधिकारिक निर्णय लिन लागेको हो। बैठकमा क्लस्टरअनुसार महिला, दलित, आदिवासी जनजाति लगायतको प्रतिनिधित्व सुनिश्चित गर्दै नामहरू तय गरिनेछ।
पार्टीका कार्यवाहक मुख्य सचिव कृष्णप्रसाद दुलालद्वारा जारी विज्ञप्तिमा केन्द्रीय कार्यसम्पादन समितिका सम्पूर्ण पदाधिकारी एवं सदस्यहरूलाई अनिवार्य उपस्थित हुन अनुरोध गरिएको छ। निर्वाचनमा अपेक्षित नतिजा नआएको र पार्टी दोस्रो स्थानमा खुम्चिएको अवस्थामा हुन लागेको यो बैठकलाई सांसद छनोटका साथै भावी राजनीतिक रणनीतिका दृष्टिले पनि महत्त्वपूर्ण मानिएको छ।
कांग्रेसले यस पटकको निर्वाचनमा समानुपातिकतर्फ २० सिट प्राप्त गरेको छ। यी सिटहरूमा कसलाई पठाउने भन्ने विषयमा पार्टीभित्र विभिन्न आकाङ्क्षीहरू रहेकाले बैठकमा गहन छलफल हुने र सहमति जुटाएर नामावली आयोगमा पठाइनेछ।