काठमाडौँ । नेपाली कांग्रेसको केन्द्रीय कार्यसमिति बैठक आज (आइतबार) बिहान ८ बजेदेखि पार्टी केन्द्रीय कार्यालय सानेपामा पुनः बस्दैछ। केन्द्रीय सदस्य मधु आचार्यका अनुसार गत शुक्रबारदेखि सुरु भएको यस बैठकमा आज पनि समसामयिक राजनीतिक विषय र सांगठनिक एजेण्डाहरूमा छलफल जारी रहनेछ।
बैठकको मुख्य आकर्षण उपसभापति विश्वप्रकाश शर्माले प्रस्तुत गर्नुभएको प्रतिनिधि सभा निर्वाचनको प्रारम्भिक समीक्षा प्रतिवेदन रहेको छ। उक्त प्रतिवेदनमाथि केन्द्रीय सदस्यहरूले पालैपालो आफ्नो धारणा र टिप्पणी राख्ने क्रम चलिरहेको छ। निर्वाचनमा पार्टीले प्राप्त गरेको नतिजा र आगामी रणनीतिका बारेमा नेताहरूबीच गम्भीर मन्थन भइरहेको बुझिएको छ।
यसैगरी, बैठकमा पार्टी सभापति गगन थापाले दिनुभएको राजीनामाको विषयले पनि प्राथमिकता पाएको छ। थापाको राजीनामाका सम्बन्धमा सदस्यहरूले आ-आफ्नो धारणा राखिरहेका छन्। अहिलेसम्मको छलफलमा अधिकांश केन्द्रीय सदस्यहरूले सभापति थापाको राजीनामा अस्वीकृत गर्नुपर्ने र उहाँकै नेतृत्वमा पार्टीलाई अगाडि बढाउनुपर्नेमा जोड दिइरहेका छन्। आजको बैठकले यी महत्त्वपूर्ण विषयहरूमा ठोस निष्कर्ष निकाल्न सक्ने अपेक्षा गरिएको छ।
