ललितपुर । नेपाली कांग्रेसका प्रवक्ता देवराज चालिसेले पार्टी सभापति गगन थापाले दिनुभएको राजीनामा फिर्ता हुनुपर्ने पक्षमा केन्द्रीय सदस्यहरू शतप्रतिशत एकमत रहेको बताउनुभएको छ। ललितपुरको सानेपास्थित पार्टी मुख्यालयमा जारी केन्द्रीय कार्यसमितिको बैठकमा सहभागी नेताहरूले निर्वाचनको निर्मम समीक्षा गर्दै सभापतिको राजीनामा कुनै पनि हालतमा स्वीकृत गर्न नहुने धारणा राखेका हुन्।
प्रवक्ता चालिसेका अनुसार हालसम्म बैठकमा धारणा राख्ने ४६ जना केन्द्रीय सदस्यहरू सबैले राजीनामा अस्वीकृत गरी थापाले नै नेतृत्वलाई निरन्तरता दिनुपर्नेमा जोड दिएका छन्। प्रतिनिधि सभा सदस्य निर्वाचनमा पार्टीले व्यहोरेको पराजयपछि सभापति थापाले त्यसको नैतिक जिम्मेवारी लिँदै पदबाट राजीनामा दिनुभएको थियो। सोही राजीनामा र निर्वाचनको विस्तृत समीक्षालाई मुख्य एजेन्डा बनाएर कांग्रेसको बैठक सञ्चालन भइरहेको छ।
बैठकमा राजीनामालाई अस्वीकृत गर्ने प्रस्ताव समेत पेस गरिएको छ, जसमा आधारित भएर अधिकांश सदस्यहरूले आफ्नो राय दिइरहेका छन्। “हारको जिम्मेवारी नेतृत्वले मात्र नभई सिङ्गो सङ्गठनले लिनुपर्छ। यस्तो सङ्कटको घडीमा नेतृत्व परिवर्तन गर्दा पार्टी थप कमजोर हुन्छ,” बैठकमा सहभागी सदस्यहरूको सामूहिक तर्क छ। प्रवक्ता चालिसेले हालसम्म बोलेका सबै ४६ जना साथीहरूले सभापतिको राजीनामा फिर्ता हुनुपर्नेमा एकमत जाहेर गरेको जानकारी दिनुभयो।
निर्वाचनमा व्यहोरेको क्षतिलाई पूर्ति गर्न र पार्टीलाई पुनः एकजुट बनाएर लैजान थापाकै नेतृत्व आवश्यक रहेको सहभागीहरूको निष्कर्ष देखिएको छ। अधिकांश नेताहरूले व्यक्तिको राजीनामा भन्दा पनि नीतिगत सुधार र सङ्गठन सुदृढीकरणमा जोड दिनुपर्ने माग गरिरहेका छन्। जारी बैठकले राजीनामाका सम्बन्धमा छिट्टै औपचारिक निर्णय सार्वजनिक गर्ने तयारी गरेको छ, जसले कांग्रेसको भावी राजनीतिक दिशा तय गर्नेछ।
