काठमाडौँ । निवर्तमान हुन लाग्नुभएकी अन्तरिम सरकारकी प्रधानमन्त्री सुशीला कार्कीले बिहीबार साँझ राष्ट्रका नाममा विशेष सम्बोधन गर्नुभएको छ। प्रधानमन्त्रीको सरकारी निवास बालुवाटारबाट गरिएको सम्बोधनका क्रममा उहाँले भदौ २३ र २४ गतेको ‘जेन-जी’ आन्दोलनपछि प्राप्त राजनीतिक उपलब्धिको रक्षा गर्दै सफलतापूर्वक निर्वाचन सम्पन्न गराउन पाएकोमा खुसी व्यक्त गर्नुभयो।
सम्बोधनका क्रममा प्रधानमन्त्री कार्कीले फागुन २१ गते सम्पन्न प्रतिनिधिसभा सदस्य निर्वाचनको नतिजाले परिवर्तनको पक्षमा नागरिकको स्पष्ट जनादेश दिएको बताउनुभयो। उहाँले भन्नुभयो, “नेपालको वर्तमान निर्वाचन प्रणालीमा कुनै पनि दलले स्पष्ट बहुमत प्राप्त गर्न सक्दैन भन्ने वर्षौँदेखिको भाष्यलाई यस पटकको जनमतले गलत सावित गरिदिएको छ।” राष्ट्रिय स्वतन्त्र पार्टीले १८२ सिटसहित ल्याएको बहुमतलाई उहाँले नयाँ युगको सुरुवातका रूपमा चित्रण गर्नुभयो।
कार्कीले युवाको नेतृत्वमा बन्न लागेको नयाँ सरकारले ‘जेन-जी’ आन्दोलनका माग र आम नागरिकको आकांक्षाबमोजिम सुशासन स्थापना, रोजगारी सिर्जना, भ्रष्टाचारको अन्त्य र आर्थिक विकासको क्षेत्रमा नतिजामुखी काम गर्ने विश्वास व्यक्त गर्नुभयो। ६ महिनाअघि संकटको समयमा आफूले सम्हालेको जिम्मेवारी निर्वाचनमार्फत जननिर्वाचित सरकारलाई हस्तान्तरण गर्न लाग्दा आफू सन्तुष्ट रहेको र धेरै आशा बोकेर बिदा हुन लागेको उहाँको भनाइ थियो।
यसैबीच, नवनिर्वाचित प्रधानमन्त्री बालेन्द्र शाहले आजै (शुक्रबार) पद तथा गोपनीयताको शपथ लिने कार्यक्रम रहेको छ। प्रधानमन्त्री कार्कीले नयाँ नेतृत्वलाई सफल कार्यकालको शुभकामना दिँदै आफ्नो कार्यकालमा सहयोग पुर्याउने निर्वाचन आयोग, सुरक्षा निकाय, कर्मचारी र आम नागरिकप्रति आभार व्यक्त गर्नुभयो। उहाँको यो सम्बोधनलाई ६ महिना लामो संक्रमणकालीन नेतृत्वको सफल अवतरणका रूपमा हेरिएको छ।
