काठमाडौँ । नेकपा (एमाले) ले आफ्ना सङ्घीय सांसदहरूलाई संसदीय अभ्यास र विधायीकी प्रक्रियाका बारेमा विशेष प्रशिक्षण दिएको छ। सिंहदरबारस्थित संसद् सचिवालयमा शनिबार आयोजित कार्यक्रममा प्रतिनिधिसभा र राष्ट्रियसभाका सदस्यहरूलाई संसद्मा खेल्नुपर्ने भूमिकाबारे प्रशिक्षित गरिएको हो।
सांसद ऐन महरका अनुसार, प्रशिक्षणमा वरिष्ठ अधिवक्ता टीकाराम भट्टराईले संसद्मा ‘विधेयक निर्माणको प्रक्रिया र कानुनी जटिलता’ का विषयमा कार्यपत्र प्रस्तुत गर्नुभएको थियो। त्यस्तै, राष्ट्रियसभाका पूर्वसचिव राजेन्द्र फुयाँलले ‘प्रभावकारी संसद् र रचनात्मक सांसद’ शीर्षकमा संसदीय अभ्यासका व्यावहारिक प्रश्न र समाधानका उपायहरूबारे जानकारी गराउनुभएको थियो।
पार्टीभित्र पछिल्लो समय विकसित राजनीतिक घटनाक्रम र सचिवालय बैठकको दबाबका बीच आयोजना गरिएको यस प्रशिक्षणमा कार्यवाहक अध्यक्ष एवं संसदीय दलका नेता रामबहादुर थापा ‘बादल’ सहित एमालेका दुवै सदनका सांसदहरूको उपस्थिति रहेको थियो। बालेन्द्र शाह नेतृत्वको सरकार र ‘जेनजी’ आन्दोलनपछिको नयाँ राजनीतिक शक्ति सन्तुलनमा एमालेका सांसदहरूले संसद्मा कसरी प्रभावकारी र रचनात्मक भूमिका निर्वाह गर्ने भन्ने विषयमा यो प्रशिक्षण केन्द्रित रहेको बुझिएको छ।
विशेष गरी नयाँ विधेयकहरूमाथि हुने छलफलमा सांसदहरूको सक्रियता बढाउन र संसदीय मर्यादालाई कायम राख्दै जनताका मुद्दाहरू कसरी मुखरित गर्ने भन्नेबारे नेताहरूले जोड दिएका छन्। पार्टीभित्रको आन्तरिक वैचारिक बहस र बाहिरी राजनीतिक चुनौतीका बीच आयोजना गरिएको यो प्रशिक्षणलाई एमालेले आफ्नो संसदीय मोर्चालाई थप सुदृढ बनाउने प्रयासका रूपमा लिएको छ।
