वासिङ्टन डीसी। अमेरिकी राष्ट्रपति डोनाल्ड ट्रम्पलाई इरानविरुद्ध सैन्य कारबाही गर्ने अधिकारमा अङ्कुश लगाउने उद्देश्यले ल्याइएको सङ्कल्प प्रस्ताव सिनेटमा चौथो पटक पनि असफल भएको छ। संसद्को पूर्वस्वीकृति बिना इरानसँगको द्वन्द्वमा सैन्य बल प्रयोग गर्न बन्देज लगाउने प्रावधानसहितको उक्त प्रस्तावको विपक्षमा ५२ र पक्षमा ४७ मत परेको थियो। रिपब्लिकन पार्टीको बहुमत रहेको सिनेटमा यो मतदान मुख्यतया दलीय आधारमा विभाजित देखिएको छ।
विपक्षी डेमोक्र्याटहरूले प्रस्ताव असफल भए पनि हरेक हप्ता नयाँ प्रस्तावहरू ल्याइरहने चेतावनी दिएका छन्। उनीहरूका अनुसार यस प्रक्रियाले युद्धको विषयमा कुन सांसदको धारणा के छ भन्ने कुरा जनताका सामु स्पष्ट पार्नेछ। धेरैजसो रिपब्लिकन सांसदहरूले ट्रम्पको कदमलाई समर्थन गरे तापनि केहीले भने युद्ध लम्बिएमा आफ्नो धारणा परिवर्तन हुन सक्ने सङ्केत गरेका छन्। राष्ट्रपति ट्रम्पले भने बुधबार फक्स न्यूजसँगको अन्तर्वार्तामा युद्ध ‘लगभग अन्त्यको नजिक’ पुगेको दाबी गर्नुभएको छ।
अमेरिकी र इजरायली सेनाले गत फेब्रुअरी २८ देखि सुरु गरेको आक्रमणका बीच यो राजनीतिक खिचातानी बढेको हो। अमेरिकी सङ्घीय कानुन अनुसार ६० दिनभन्दा बढी सैन्य कारबाही जारी राख्न संसद्को अनिवार्य अनुमति चाहिन्छ। सन् १९७३ को ‘वार पावर्स रिजोलुसन’ कानुनलाई आधार बनाउँदै डेमोक्र्याटहरूले ट्रम्पलाई नियन्त्रण गर्न खोजे पनि ह्वाइट हाउसले राष्ट्रिय सुरक्षाको कारण देखाउँदै यो समयसीमा थप ३० दिन लम्ब्याउन सक्ने प्रावधान समेत रहेको छ।
