काठमाडौँ । नेपाली कांग्रेसका सांसद सुनिलबहादुर थापाले प्रधानमन्त्री बालेन्द्र शाहले प्रतिनिधि सभामा दिएको नेपाल-भारत सीमासम्बन्धी अभिव्यक्तिप्रति कडा आपत्ति जनाएका छन्। बुधबार बसेको राष्ट्रिय सभाको बैठकमा विशेष समय लिएर बोल्दै सांसद थापाले प्रधानमन्त्रीको उक्त भनाइ अत्यन्तै गम्भीर, दुर्भाग्यपूर्ण र गैरजिम्मेवार भएको आरोप लगाए। नेपालले भारतको भूमि अतिक्रमण गरेको भन्ने आशय दिने खालका राष्ट्रप्रमुखका अभिव्यक्तिले अन्तर्राष्ट्रिय स्तरमा नेपालको कूटनीतिक छवि धुमिल बनाउने चेतावनी उनले दिए।
प्रधानमन्त्री शाहले लिपुलेक, कालापानी र लिम्पियाधुराको सीमा विवादका विषयमा बेलायत (यूके) सँग पनि छलफल भइरहेको कूटनीतिक अभिव्यक्ति दिएका थिए। त्यसप्रति लक्षित गर्दै सांसद थापाले नेपाल-भारतबिचको द्विपक्षीय सीमा र भू-राजनीतिक मुद्दामा तेस्रो मुलुकको भूमिका वा धारणा जोड्ने प्रयास प्रत्युत्पादक हुने जिकिर गरे। यस्ता संवेदनशील विषयहरू स्थापित कूटनीतिक संयन्त्र र द्विपक्षीय संवादमार्फत नै समाधान हुनुपर्नेमा तेस्रो पक्षलाई अनावश्यक रूपमा प्रवेश गराउँदा नेपाल-भारत सम्बन्धमा थप अविश्वास र तनाव उत्पन्न हुन सक्ने उनको भनाइ छ।
सांसद थापाले प्रधानमन्त्रीसँग आफ्नो भनाइ पुष्टि गर्ने ठोस प्रमाण भए संसद् र जनतासमक्ष तत्काल सार्वजनिक गर्न चुनौती दिएका छन्। प्रमाण नभए हल्का टिप्पणी गरेर राष्ट्रिय हितमा भ्रम सिर्जना गरेको भन्दै प्रधानमन्त्रीले राष्ट्रसमक्ष क्षमायाचना गर्नुपर्ने माग समेत गरे। परराष्ट्र मन्त्रालयले सुस्ता क्षेत्रको ‘क्रस होल्डिङ’ बारे प्रधानमन्त्रीले बोल्नुभएको भनी स्पष्टीकरण दिए पनि ‘क्रस बोर्डर अकुपेसन’ लाई भूमि अतिक्रमण भन्न नमिल्ने भन्दै थापाले सरकारको बचाउ शैलीप्रति पनि असन्तुष्टि जनाएका छन्। प्रधानमन्त्रीको यही अभिव्यक्तिका कारण संसद्मा गतिरोध उत्पन्न भइरहेको भन्दै उनले संसद् सुचारु गराउन प्रधानमन्त्रीलाई जिम्मेवार बन्न आग्रह गरे।
