काठमाडौँ । वैदेशिक रोजगारीका क्रममा पूर्वी रोमानियाको बाकाउ सहरमा कार्यरत दुई जना नेपाली नागरिकको रेलको ठक्करबाट दुःखद निधन भएको छ। चिमी सडक खण्डमा तीव्र गतिमा गुडिरहेको रेलले लिकमा रहेका उनीहरूलाई ठक्कर दिँदा सो दुर्घटना भएको हो।
बाकाउ आपत्कालीन सेवा निर्देशनालयका अनुसार स्थानीय समय अनुसार आइतबार बिहान करिब ३:२१ बजे दुर्घटनाबारे जानकारी प्राप्त हुनासाथ उद्धारका लागि दमकल, एम्बुलेन्स र सघन उपचार मोबाइल युनिटसहितको टोली घटनास्थल पुगेको थियो। तर, उद्धार टोली पुग्नुअघि नै दुवै जनाको घटनास्थलमै मृत्यु भइसकेको र चिकित्सक टोलीले उनीहरूलाई मृत घोषित गरेको जनाइएको छ।
प्रारम्भिक अनुसन्धानबाट मृतकहरू नेपाली नागरिक भएको पुष्टि भए तापनि उनीहरूको नाम तथा नेपालस्थित स्थायी ठेगाना खुल्न बाँकी रहेको छ। नेपालीहरू रेलको लिकमा कसरी पुगे र दुर्घटना कसरी भयो भन्ने विषयमा स्थानीय प्रहरी तथा रेलवे अधिकारीहरूले गम्भीरताका साथ अनुसन्धान अगाडि बढाएका छन्।
