काठमाडौँ । देशभर मनसुनी वायुको प्रभाव कायमै रहँदा शुक्रबार विभिन्न प्रदेशका पहाडी तथा हिमाली भू-भागहरूमा मेघगर्जन र चट्याङ्गसहित वर्षाको सम्भावना रहेको जल तथा मौसम विज्ञान विभागले जनाएको छ । मौसम पूर्वानुमान महाशाखाका अनुसार आज देशभर साधारणतया बादल लाग्नेछ । कोशी, बागमती र गण्डकी प्रदेशका हिमाली भू-भागका केही स्थानमा तथा लुम्बिनी, कर्णाली र सुदूरपश्चिम प्रदेशका हिमाली भेगका थोरै स्थानमा मेघगर्जनसहित मध्यमसम्मको वर्षा र हिमपातको आकलन गरिएको छ ।
महाशाखाका अनुसार शुक्रबार दिउँसो कोशी, बागमती, गण्डकी, लुम्बिनी र कर्णाली प्रदेशका पहाडी भू-भागका केही स्थानमा तथा सुदूरपश्चिमका पहाडी क्षेत्रका थोरै स्थानमा मेघगर्जन र चट्याङ्गसहित मध्यमसम्म वर्षा हुनेछ । यस्तै बागमती, गण्डकी र लुम्बिनी प्रदेशको तराईका केही स्थान तथा मधेश, कोशी र सुदूरपश्चिम प्रदेशका तराई भू-भागका थोरै स्थानमा मध्यम वर्षाको सम्भावना छ । विशेषगरी कोशी, बागमती, गण्डकी र लुम्बिनी प्रदेशको पहाडी भू-भागका एक-दुई स्थानमा भारी वर्षाको सम्भावना रहेकाले सावधानी अपनाउन आग्रह गरिएको छ ।
यसैगरी रातिको समयमा पनि देशभर साधारणतया बादल लाग्नेछ । राति कोशी, बागमती र गण्डकीका पहाडी भू-भागका केही स्थान तथा अन्य प्रदेशका पहाडी र तराई भू-भागका थोरै स्थानहरूमा मेघगर्जन र चट्याङ्गसहित मध्यमसम्म वर्षा हुन सक्नेछ । पहाडी भेगमा भारी वर्षाका कारण गेग्रान बहाव, बाढी, पहिरो तथा भू-क्षयको जोखिम रहनुका साथै नदीनालाहरूमा पानीको सतह बढ्न सक्ने भएकाले सतर्कता अपनाउन महाशाखाले अनुरोध गरेको छ ।
