काठमाडौँ । रसुवाको हाकु र मैलुङ क्षेत्रमा निर्माणाधीन अपर त्रिशूली–१ जलविद्युत आयोजनाको सुरुङभित्र पाँच जनाको शव फेला परेको छ। गत भदौ १० गतेको भीषण बाढीपछि सुरुङभित्र फसेकाहरूको खोजी तथा उद्धारका क्रममा बिहीबार टनेलको जालीभित्र शवहरू देखिएका हुन्।
सुरुङको संरचनात्मक सुरक्षाका लागि लगाइएको फलामे जालीभित्र शवहरू अड्किएकाले जाली काटेर निकाल्नुपर्ने अवस्था रहेको उद्धारकर्मीहरूले बताएका छन्। रसुवाका प्रहरी नायब उपरीक्षक (डीएसपी) अशोक थापाका अनुसार शव निकाल्नका लागि सुरक्षाकर्मी र प्राविधिकहरूको टोली घटनास्थलमा खटिइसकेको छ। यस्तै, नेपाली सेनाको सैनिक जनसम्पर्क तथा सूचना निर्देशनालयले पनि माथिल्लो त्रिशूली–१ मा फेला परेका मानव अङ्ग तथा शव बाहिर निकाल्ने कार्य तीव्र गतिमा भइरहेको जनाएको छ।
भीषण बाढीका कारण यस आयोजनाबाट कुल ३३२ जना कामदार तथा कर्मचारी सम्पर्कविहीन भएका थिए। उद्धार टोलीले यसअघि गत भदौ २० गते सुरुङको २२५ मिटर भित्रबाट चिनियाँ नागरिक लुआइतोलाई सकुशल जीवितै उद्धार गरेको थियो भने बाँकी बेपत्ताहरूको खोजी कार्य निरन्तर जारी छ।
