चितवन । पृथ्वी राजमार्गअन्तर्गत धादिङ र चितवन जोड्ने मलेखु–मुग्लिङ सडकखण्डमा आज सोमबार चार घण्टा सवारी आवागमन पूर्ण रूपमा बन्द हुने भएको छ । सडक विस्तार तथा स्तरोन्नति कार्यअन्तर्गत आकाशे पुलको गर्डर राख्नुपर्ने भएकाले यातायात आवागमन रोक्न लागिएको हो ।
नागढुङ्गा–मुग्लिङ सडक आयोजना (पश्चिम खण्ड) का अनुसार सडकखण्डको मझिमटारमा निर्माण भइरहेको आकाशे पुलको यात्रु हिँड्ने मुख्य भाग (गर्डर) क्रेनको सहायताले राख्ने काम गर्नुपर्ने भएकाले बिहान ११:०० बजेदेखि दिउँसो ३:०० बजेसम्म सडक बन्द गरिनेछ ।
आयोजनाका पश्चिम खण्डका सूचना अधिकारी सचेन्द्र मिश्रका अनुसार निर्माण कार्यलाई छिटो र सुरक्षित रूपमा सम्पन्न गर्न चार घण्टासम्म यस खण्ड भएर गुड्ने साना तथा ठूला सबै प्रकारका सवारीसाधन सञ्चालनमा रोक लगाइएको छ ।
सडक बन्द रहने समयमा सवारी चालक तथा यात्रुहरूलाई धैर्यतापूर्वक यथास्थानमा रोकिन, लेन अनुशासन कडाइका साथ पालना गर्न र ट्राफिक प्रहरीको निर्देशन अनुसार चल्न आयोजनाले विशेष अनुरोध गरेको छ । सडक बन्दका कारण यात्रुहरूमा पर्न जाने असुविधाप्रति आयोजनाले क्षमायाचना समेत गरेको छ ।
