काठमाडौँ । प्रमुख प्रतिपक्षी दल नेपाली कांग्रेससहितका विपक्षी दलहरूले संघीय संसद्को बैठक तत्काल आह्वान गर्न सरकारसँग जोडदार माग गरेका छन् । सिंहदरबारस्थित नेपाली कांग्रेसको संसदीय दलको कार्यालयमा सोमबार बसेको विपक्षी दलहरूको संयुक्त बैठकले संसद् अधिवेशन तुरुन्त बोलाउन माग गर्ने साझा निर्णय गरेको हो ।
मुलुकमा देखिएका समसामयिक राजनीतिक, आर्थिक तथा जनसरोकारका विषयहरूमाथि संसद्मा गहन छलफल हुनुपर्ने भन्दै विपक्षी गठबन्धनले संसद् बैठक बोलाउन ढिलाइ नगर्न सरकारको ध्यानाकर्षण गराएको छ । बैठकपछि सञ्चारकर्मीहरूलाई प्रतिक्रिया दिँदै नेपाली कम्युनिस्ट पार्टीका नेता प्रमेश हमालले जनसरोकारका ज्वलन्त मुद्दाहरू सम्बोधन गर्न र सरकारलाई संसद्प्रति जवाफदेही बनाउन संसद् बैठक तत्काल आह्वान गर्नुपर्ने साझा निष्कर्ष निकालिएको जानकारी दिनुभयो ।
सिंहदरबारमा आयोजित विपक्षी दलहरूको उक्त छलफलमा नेपाली कांग्रेसको तर्फबाट संसदीय दलका नेता भीष्मराज आङ्दाम्बे, राष्ट्रिय सभा संसदीय दलकी नेता कमला पन्त र प्रमुख सचेतक बासना थापा सहभागी हुनुहुन्थ्यो ।
त्यस्तै बैठकमा नेकपा (एमाले) का तर्फबाट संसदीय दलकी उपनेता पद्मा अर्याल, नेपाली कम्युनिस्ट पार्टीबाट नेताहरू प्रमेश हमाल, वर्षमान पुन र युवराज दुलाल उपस्थित हुनुहुन्थ्यो । साथै जनता समाजवादी पार्टी (जसपा) का अध्यक्ष महन्थ ठाकुर र राष्ट्रिय प्रजातन्त्र पार्टी (राप्रपा) की नेतृ खुश्बु ओलीको समेत बैठकमा सहभागिता रहेको थियो ।
विपक्षी दलहरूले सरकारले संसद् छलेर महत्वपूर्ण निर्णयहरू गरिरहेको आरोप लगाउँदै जनप्रतिनिधिमूलक सर्वोच्च संस्था संसद्लाई तत्काल सुचारु गरी जनताका जल्दाबल्दा समस्याहरूबारे निकास खोज्न सरकार गम्भीर हुनुपर्नेमा जोड दिएका छन् ।
