काठमाडौं । मंसरिमा एक महिनामा मात्रै पौने २ खर्ब रुपैयाँ भन्दा बढी रेमिट्यान्स(विप्रेषण आप्रवाह) नेपाल त्रिएककोे छ । चालु आर्थिक वर्षको मंसिरमा मात्रै रेमिट्यान्स स्वरुप १ खर्ब ८३ अर्ब १८ करोड रुपैयाँ नेपाल आएको तथ्यांक नेपाल राष्ट्र बैंकले सार्वजनिक गरेको हो ।
अघिल्लो वर्षको सोही महिनामा १ खर्ब १८ अर्ब ७९ करोड रुपैयाँ रेमिट्यान्स नेपाल आएको थियो ।
यता चालु आर्थिक वर्ष २०८२÷८३ को पाँच महिनामा विप्रेषण आप्रवाह ३५.६ प्रतिशतले वृद्धि भई रु.८ खर्ब ७० अर्ब ३१ करोड पुगेको छ । अघिल्लो वर्षको सोही अवधिमा विप्रेषण आप्रवाह ४.७ प्रतिशतले बढेको थियो ।
यस अवधिमा अमेरिकी डलरमा विप्रेषण आप्रवाह २९.० प्रतिशतले वृद्धि भई ६ अर्ब १६ करोड पुगेको छ । अघिल्लो वर्ष यस्तो आप्रवाह ३.४ प्रतिशतले बढेको थियो ।
यस्तै समीक्षा अवधिमा खुद द्वितीय आय (खुद ट्रान्सफर) रु. ९५४ अर्ब ७८ करोड पुगेको छ । अघिल्लो वर्षको सोही अवधिमा यस्तो आय रु.७ खर्ब ४३ करोड रहेको थियो ।
यता ५ महिनामा १ लाख ७५ हजार ५९१ जना नेपाल वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिएका छन् भने पुनः श्रम स्वीकृति लिनेको सङ्ख्या १ लाख ६३ हजार ९२४ रहेकोछ ।
अघिल्लो वर्षको सोही अवधिमा यस्तो सङ्ख्या क्रमशः १ लाख ९० हजार ३८४ र १ लाख ३५ हजार ४२५ रहेको थियो ।
