काठमाडौँ । स्थानीय बजारमा आज (बिहीबार) सुनको मूल्यमा उल्लेख्य गिरावट आएको छ। नेपाल सुनचाँदी व्यवसायी महासंघका अनुसार आज सुनको भाउ प्रतितोला २ हजार रुपैयाँले घटेको हो।
आजका लागि छापावाल सुनको मूल्य ३ लाख १७ हजार रुपैयाँ तोकिएको छ। अघिल्लो दिन (बुधबार) सुन प्रतितोला ३ लाख १९ हजार रुपैयाँमा कारोबार भएको थियो। गत माघ १५ गते सुनको भाउ हालसम्मकै उच्च बिन्दु प्रतितोला ३ लाख ३९ हजार रुपैयाँ पुगेर नयाँ रेकर्ड कायम गरेको थियो, जसको तुलनामा अहिले सुनको भाउ निकै तल झरेको देखिन्छ।
सुनसँगै चाँदीको मूल्यमा पनि आज ठूलो गिरावट आएको छ। चाँदी तोलामा २०५ रुपैयाँले घटेर प्रतितोला ५ हजार ५१५ रुपैयाँ कायम भएको छ। अघिल्लो दिन चाँदी ५ हजार ७२० रुपैयाँमा कारोबार भएको थियो। अन्तर्राष्ट्रिय बजारमा डलर बलियो बन्दै जाँदा र लगानीकर्ताहरू अन्य क्षेत्रमा आकर्षित हुँदा सुनचाँदीको मूल्यमा यो गिरावट देखिएको विश्लेषण गरिएको छ।
