काठमाडौँ । काठमाडौँ उपत्यकामा ट्राफिक नियम उल्लङ्घन गर्ने सवारीचालकहरूमाथि प्रहरीले निगरानी र कारबाहीलाई थप कडा बनाएको छ। सडक अनुशासन कायम गर्न र दुर्घटना न्यूनीकरण गर्ने उद्देश्यले गरिएको जाँचका क्रममा पछिल्लो २४ घण्टामा मात्रै विभिन्न नियम तोड्ने १ हजार ८ सय १३ जना सवारीचालक कारबाहीमा परेका छन्। यस कारबाहीबाट राज्यकोषमा ५ लाख २८ हजार ५ सय १ रुपैयाँ राजस्व दाखिला भएको छ।
काठमाडौँ उपत्यका ट्राफिक प्रहरी कार्यालयका अनुसार, सङ्केत बत्ती (ट्राफिक लाइट) को बेवास्ता गर्ने ११९ जना र तीव्र गतिमा सवारी चलाउने ११५ जनालाई जरिवाना गरिएको छ। त्यस्तै, नियमविपरीत सञ्चालन गरिएका १०५ वटा ‘राइड सेयरिङ’ सवारीसाधन कारबाहीमा परेका छन् भने मादक पदार्थ सेवन (मापसे) गरी सवारी चलाउने ९ जना चालकलाई समेत कारबाहीको दायरामा ल्याइएको छ।
यसका अतिरिक्त, सडकको लेन अनुशासन पालना नगर्ने १०२, निषेधित क्षेत्रमा हर्न बजाउने ७९, सडकपेटीमा अनधिकृत रूपमा पार्किङ गर्ने ११७ र एकतर्फी (वान-वे) सडकमा सवारी हुइँक्याउने ६५ जनालाई ट्राफिक प्रहरीले जरिवाना गराएको छ। अन्य विविध सवारी नियम उल्लङ्घन गर्ने १ हजार १ सय १० जनासमेत कारबाहीमा परेको कार्यालयले जनाएको छ। आगामी दिनमा पनि ट्राफिक चेकजाँचलाई अझै प्रभावकारी रूपमा अगाडि बढाइने प्रहरीको भनाइ छ।
