हेटौँडा । फागुन २१ गते हुन लागेको निर्वाचनको सुरक्षा चुनौती बढिरहेका बेला हेटौँडामा शंकास्पद वस्तु भेटिएपछि स्थानीयवासी त्रसित बनेका छन्। आज बिहान ५:१५ बजे हेटौँडा–१६, चिसापानीस्थित धरान–चतरा सडक खण्डको बीच भागमा शंकास्पद वस्तु फेला परेको हो।
सेतो कपडाले बेरिएको र बाहिरपट्टि ‘खतरा’ लेखिएको उक्त वस्तु देखेपछि स्थानीयले तत्काल प्रहरीलाई खबर गरेका थिए। निर्वाचनको मुखमा सुरक्षा व्यवस्था कडा पारिएकै समयमा सडकको बीच भागमा यस्तो वस्तु भेटिनुलाई अर्थपूर्ण रूपमा हेरिएको छ।
जिल्ला प्रहरी कार्यालयका अनुसार घटनास्थलमा तत्कालै सेना र प्रहरीको टोली पुगेको थियो। नेपाली सेनाको टोलीले बिहान ८:१० बजे उक्त शंकास्पद वस्तुलाई सुरक्षित रूपमा डिस्पोज गरेको छ। निर्वाचनलाई लक्षित गरी सुरक्षा थ्रेट पैदा गर्न खोजिएको हुन सक्ने आशंकामा प्रहरीले थप अनुसन्धान अगाडि बढाएको छ।
