काठमाडौँ । देशका प्रमुख ६ वटा स्वास्थ्य विज्ञान प्रतिष्ठानका नवनियुक्त उपकुलपतिहरूले पद तथा गोपनीयताको औपचारिक शपथ ग्रहण गरेका छन्। शुक्रबार स्वास्थ्य तथा खाद्य स्वच्छता मन्त्री निशा मेहतासमक्ष उनीहरूले आ-आफ्नो पदको जिम्मेवारी सम्हाल्दै शपथ लिएका हुन्।
नेपाल सरकारले हालै जारी गरेको ‘स्वास्थ्य विज्ञान प्रतिष्ठानहरूको उपकुलपति छनोट तथा सिफारिस सम्बन्धी एकीकृत कार्यविधि, २०८३’ अनुसार गठित विशेषज्ञ समितिको सिफारिसका आधारमा यी नयाँ नियुक्तिहरू गरिएको हो। पारदर्शी प्रक्रियामार्फत छनोट भएका नेतृत्वले प्रतिष्ठानको शैक्षिक, प्राज्ञिक र प्रशासनिक सुधारमा महत्त्वपूर्ण भूमिका खेल्ने अपेक्षा गरिएको छ।
शपथ ग्रहण गर्नेहरूमा चिकित्सा विज्ञान राष्ट्रिय प्रतिष्ठान (न्याम्स) का उपकुलपति डा. विवेक आचार्य, पाटन स्वास्थ्य विज्ञान प्रतिष्ठानका डा. नवीस मान सिं प्रधान र बीपी कोइराला स्वास्थ्य विज्ञान प्रतिष्ठानका डा. स्मृति कार्की रहेका छन्। यसैगरी, पोखरा स्वास्थ्य विज्ञान प्रतिष्ठानका डा. नारायण सिंह गुरुङ, कर्णाली स्वास्थ्य विज्ञान प्रतिष्ठानका डा. सूर्यमान मेन्याङबो तथा राप्ती स्वास्थ्य विज्ञान प्रतिष्ठानका उपकुलपति डा. अजय कुमार मिश्रले पनि मन्त्री मेहतासमक्ष शपथ ग्रहण गरेका छन्।
