प्रधानमन्त्री केपी शर्मा ओलीले गरेको एक आग्रह प्रधानन्यायाधीस चोलेन्द्र समशेर जवराले नमानेका कारण ओली अप्ठेरोमा परेका छन् ।
प्रधानमन्त्री ओलीले मंगलवार संवैधानिक परिषद्को बैठक बोलाएका थिए । तर सो बैठक अनिश्चितकालका लागि स्थगित भएको छ । प्रधानन्यायाधीस जवरा उपस्थित हुन नमानेका कारण वैठक स्थगित भएको हो ।
जसका कारण संवैधानिक आयोगहरुमा सरकारले गरेको नियुक्ति पनि अन्यौलमा परेको छ । प्रधानमन्त्री ओलीले मंगलवारको बैठक सारेर बुधबार साँझ राख्न गरेको प्रयास पनि असफल भएको छ । प्रधानन्यायाधीश चोलेन्द्र समशेर जबराको असहमतिका कारण परिषद्को बैठक राख्ने प्रयास असफल भएको हो ।
प्रधानमन्त्री ओलीद्वारा संसद विघटन गरिएकै दिन गत पुस ५ गते संवैधानिक परिषद्ले विभिन्न ११ वटा संवैधानिक आयोगहरुमा ३८ जना पदाधिकारी नियुक्तिको सिफारिस गरेको थियो । आफ्नै पार्टी भित्रका नेताहरुबीचमै सहमति जुट्न नसक्दा सरकारले लामो समय देखि संवैधानिक आयोगहरुमा नियुक्त गर्न सकेको छैन ।
सोही विषय पेचिलो बन्दै गएपछि नेकपा अनौपचारीक विभाजनमा पुगेको छ । प्रधानमन्त्री ओलीले संसद विघटन गरेकै दिन अध्यादेश मार्फत संवैधानिक आयोगहरुमा नियुक्ती सिफारिस गरेका थिए । सो सिफारिस संसदीय सुनुवाइका लागि संसद सचिवालयमा सोही दिन दर्ता भएको थियो ।
तर, सो पत्र सभामुख अग्नि सापकोटाले सोमबार परिषद्मै फिर्ता पठाइदिएपछि प्रधानमन्त्री ओलीले संवैधानिक परिषद्को बैठक राख्ने प्रयास गरेका हुन्, जुन प्रयास सफल हुन सकेन ।
सभामुखले पत्र फिर्ता पठाएपछि प्रधानमन्त्री ओलीले त्यसलाई बेवास्ता गर्दै सुनुवाइको म्याद ४५ दिन गुज्रेकाले ३८ जनालाई नियुक्त गर्नु भनी राष्ट्रपतिसमक्ष सिफारिस पठाउन संवैधानिक परिषद्को बैठक डाकेका हुन् ।
तर, प्रधानन्यायाधीश चोलेन्द्र समशेर जबराले सर्वोच्च अदालतमा संसद विघटनसम्बन्धी मुद्दा चलिरहेका बेला सोही मुद्दाका पक्ष रहेका प्रधानमन्त्रीले बोलाएको बैठकमा उपस्थित हुन नमिल्ने जवाफ दिएका छन् ।
