काठमाडौँ । नेपाली कांग्रेसको केन्द्रीय कार्यसमितिको बैठक आज (मङ्गलबार) दिउँसो १ बजे पार्टी केन्द्रीय कार्यालय सानेपामा बस्दैछ। पार्टीका कार्यवाहक मुख्य सचिव कृष्णप्रसाद दुलालका अनुसार आजको बैठकमा सहभागी हुन केन्द्रीय पदाधिकारी, सदस्यहरू तथा सातै प्रदेशका सभापतिहरूलाई निर्देशानुसार अनुरोध गरिएको छ।
यसअघि आइतबार सम्पन्न तीन दिने बैठकले पार्टी सभापति गगन थापाले दिनुभएको राजीनामालाई सर्वसम्मत रूपमा अस्वीकृत गर्ने लगायतका ६ बुँदे महत्त्वपूर्ण निर्णयहरू गरेको थियो। निर्वाचनको समीक्षा र पार्टीको आन्तरिक विवाद समाधानका लागि बसेको उक्त बैठकले नेतृत्वको विषयमा देखिएको अन्योल चिर्दै थापाकै नेतृत्वलाई निरन्तरता दिने निष्कर्ष निकालेको थियो।
आजको बैठकमा विशेष गरी आगामी १५औँ महाधिवेशनको कार्यतालिका, सांगठनिक सुधारका थप योजना र समसामयिक राजनीतिक विषयहरूमा छलफल हुने बुझिएको छ। राजीनामा प्रकरण मत्थर भएसँगै अब पार्टीलाई कसरी नयाँ गति दिने भन्नेमा नेताहरू केन्द्रित हुनेछन्। सभापति थापा आफैँले आजको बैठकको अध्यक्षता गर्ने र पार्टीको भावी कार्यदिशाका बारेमा थप स्पष्ट पार्ने अपेक्षा गरिएको छ।
