काठमाडौँ । नेपाल र भारतबिचको कूटनीतिक संवादले तीव्र गति लिएको छ। राष्ट्रिय स्वतन्त्र पार्टी (रास्वपा) का सभापति रवि लामिछाने नयाँ दिल्लीको उच्चस्तरीय राजनीतिक भेटघाट सकेर स्वदेश फर्किएकै दिन परराष्ट्रमन्त्री शिशिर खनाल भारत भ्रमणमा निस्किएका छन्। परराष्ट्रमन्त्री खनाल भारतीय विदेशमन्त्री डा. एस. जयशङ्करको सौहार्दपूर्ण निमन्त्रणामा आज शुक्रबार नयाँ दिल्ली प्रस्थान गर्न लागेका हुन्।
नेपाल र भारतबिच नियमित रूपमा हुने उच्चस्तरीय भ्रमण आदानप्रदानको सिलसिला अन्तर्गत यो भ्रमण हुन लागेको परराष्ट्र मन्त्रालयले जनाएको छ। भ्रमणका क्रममा मन्त्री खनालले आफ्ना भारतीय समकक्षी डा. जयशङ्करसँग औपचारिक द्विपक्षीय भेटवार्ता गर्ने कार्यतालिका छ। सो अवसरमा दुई देशका विदेशमन्त्रीबिच नेपाल र भारतको आपसी हितका विविध विषयमा गहन छलफल हुनेछ।
विशेष गरी दुई देशबिचको व्यापार, लगानी, कनेक्टिभिटी, ऊर्जा क्षेत्रमा सहकार्य तथा जनताबीचको आपसी सम्बन्धलाई अझ सुदृढ र विस्तार गर्ने विषयमा केन्द्रित रहेर दुई पक्षबिच वार्ता हुने मन्त्रालयले जारी गरेको विज्ञप्तिमा उल्लेख छ। औपचारिक भ्रमणका सबै कार्यक्रमहरू पूरा गरी परराष्ट्रमन्त्री खनाल आउँदो जेठ २४ गते काठमाडौँ फर्कने तालिका रहेको छ। यसअघि रास्वपा सभापति लामिछानेले नयाँ दिल्लीमा भारतीय प्रधानमन्त्री नरेन्द्र मोदीसहितका उच्च नेतृत्वसँग भेटवार्ता गरेका थिए, जसलगत्तै हुन लागेको यो सरकारी भ्रमणलाई कूटनीतिक वृत्तमा निकै चासोका साथ हेरिएको छ।
