काठमाडौँ । प्रतिपक्षी दलहरूको लगातारको अवरोधका कारण सङ्घीय प्रतिनिधि सभाको बैठक पुनः स्थगित भएको छ। मंगलबार दिउँसो बस्ने तय भएको बैठकमा विपक्षी दलहरूले आफ्नो विरोध कायम राखेपछि सभामुख डीपी अर्यालले बैठक बुधबार बिहान ११ बजेसम्मका लागि स्थगित गरेका हुन्।
प्रतिनिधिसभा बैठक सुचारु हुन नसक्नुको मुख्य कारण प्रधानमन्त्री बालेन्द्र (बालेन) शाहले संसद्मा व्यक्त गरेको विवादित अभिव्यक्ति बनेको छ। प्रधानमन्त्री शाहले केही दिनअघि सदनलाई सम्बोधन गर्ने क्रममा ‘नेपालले पनि भारतको सीमा मिचेको छ’ भनी दिएको बयानप्रति विपक्षी दलहरूले तीव्र आपत्ति जनाउँदै आएका छन्।
विपक्षी सांसदहरूले सो अभिव्यक्ति राष्ट्रिय सार्वभौमिकता र भौगोलिक अखण्डता विपरित रहेको ठहर गर्दै उक्त भनाइ संसद्को रेकर्डबाट तत्काल हटाउनुपर्ने र प्रधानमन्त्री स्वयंले सदनसमक्ष क्षमायाचना गर्नुपर्ने अडान राखेका छन्। प्रधानमन्त्रीले आफ्नो व्याख्या सच्याउनुपर्ने वा संसद्ले सीमा मिचेको कुरा स्वीकार गर्नुपर्ने भन्दै प्रतिपक्षी दलहरूले बेल घेराउ र नाराबाजी गरेपछि मङ्गलबारको बैठक पनि नियमित कार्यसूची (बजेटमाथिको छलफल) मा प्रवेश नै नगरी स्थगित हुन पुगेको हो।
