काठमाडौँ । समाजमा व्याप्त निराशा र असन्तुष्टिलाई सम्बोधन गर्न राजनीतिक दलहरूबिच एकता अपरिहार्य रहेको नेपाली कांग्रेसका उपसभापति विश्वप्रकाश शर्माले बताएका छन्। बढ्दो सामाजिक सङ्कट र आत्मदाहजस्ता गम्भीर मानवीय घटनाहरूलाई राजनीतिक खिचातानी र आरोप-प्रत्यारोपको विषय बनाउन नहुनेमा उनले जोड दिएका छन्।
मंगलबार काठमाडौँमा आयोजित एक पुस्तक विमोचन समारोहलाई सम्बोधन गर्दै उपसभापति शर्माले यस्तो धारणा राखेका हुन्। उनले हालै घटेको गणेश नेपालीको आत्मदाह प्रकरणलाई लिएर आफ्नो पार्टीले सरकारलाई घेर्ने वा दोषारोपण गर्ने नीति नलिएको प्रस्ट पारे। यसअघि प्रेम आचार्यले गरेको आत्मदाहको घटनालाई स्मरण गर्दै शर्माले पुराना वा नयाँ जुनसुकै दल सत्तामा रहँदा पनि नागरिकको असन्तुष्टि र निराशा कम हुन नसक्नु गम्भीर चिन्ताको विषय भएको औँल्याए।
“एकले अर्कोलाई दोष दिएर मात्र समस्याको समाधान हुँदैन,” उपसभापति शर्माले भने, “नेपाली समाजमा यति गम्भीर स्तरको निराशा किन फैलिँदैछ भन्ने विषयमा सबैले गम्भीरतापूर्वक सोच्न आवश्यक छ।” उनले विद्यमान नागरिक असन्तुष्टि र निराशासँग जुध्नका लागि सत्तापक्ष र प्रतिपक्ष दुवै सँगसँगै उभिएर साझा समाधानको बाटो खोज्नुको कुनै विकल्प नरहेको स्पष्ट पारे।
नागरिकका मुद्दाहरूमा राजनीति गर्नुभन्दा पनि मानवीय संवेदनालाई प्राथमिकतामा राखेर राज्य संयन्त्र र सबै राजनीतिक शक्तिले जिम्मेवारपूर्ण भूमिका निर्वाह गर्नुपर्ने उनको निष्कर्ष छ।
