काठमाडौँ । नेपालको मौसममा हाल पश्चिमी न्यूनचापीय प्रणाली सक्रिय भएसँगै देशभर चिसो बढ्ने र हिमाली क्षेत्रको जनजीवन प्रभावित हुने देखिएको छ। जल तथा मौसम विज्ञान विभागका अनुसार हाल गण्डकी, कर्णाली र सुदूरपश्चिम प्रदेशका उच्च पहाडी तथा हिमाली भू-भागमा साधारणतया बदली भई केही स्थानमा हल्का हिमपात र वर्षा भइरहेको छ। यस्तै, तराईका थोरै स्थानहरूमा तुवाँलो लागेको छ भने कोशी र मधेस प्रदेशमा आंशिक बादल लागेको छ।
सोमबारको मौसम पूर्वानुमान अनुसार तराईका केही स्थानमा हुस्सु र कुहिरो लाग्ने सम्भावना छ। देशका हिमाली भू-भागमा साधारणतया बदली रहने र केही स्थानमा हल्का हिमपात तथा वर्षाको सम्भावना रहेको महाशाखाले जनाएको छ। बाँकी भू-भागमा भने आंशिक बदली रहे पनि मौसम मुख्यतया स्थिर रहने देखिएको छ।
मंगलबारदेखि भने यो मौसमी प्रणाली अझ सशक्त हुने प्रक्षेपण गरिएको छ। मंगलबार सबै हिमाली भू-भागका केही स्थानहरूमा हल्कादेखि मध्यम हिमपात र वर्षाको सम्भावना रहेको छ। यसले गर्दा देशभर चिसो बढ्ने र उच्च हिमाली भेगमा दैनिक जनजीवनका साथै पर्यटन र पदयात्रामा समेत चुनौती थपिने देखिएको छ।
मौसममा आउने यो परिवर्तनका कारण हवाई तथा सडक यातायात समेत प्रभावित हुन सक्ने भएकाले महाशाखाले विशेष सतर्कता अपनाउन आग्रह गरेको छ। विशेषगरी चिसोले स्वास्थ्यमा पार्न सक्ने असर र यात्रा गर्दा हुन सक्ने अवरोधलाई ध्यानमा राख्दै आवश्यक पूर्वतयारी गर्न सर्वसाधारण र सरोकारवाला निकायलाई सूचित गरिएको छ।
