काठमाडौँ । आउँदो आइतबार (फागुन २४ गते) देशका अधिकांश पहाडी तथा हिमाली भू-भागमा बदली भई वर्षा र हिमपातको सम्भावना रहेको जल तथा मौसम विज्ञान विभागले जनाएको छ।
आइतबार दिउँसो कोशी, बागमती, गण्डकी र लुम्बिनी प्रदेशका पहाडी तथा हिमाली क्षेत्रका साथै कर्णाली र सुदूरपश्चिमका पहाडी भू-भागमा साधारणतया बादल लाग्नेछ। कोशी, बागमती र गण्डकी प्रदेशका पहाडी र हिमाली भू-भागका थोरै स्थानहरूमा तथा लुम्बिनी, कर्णाली र सुदूरपश्चिमका एक-दुई स्थानमा मेघगर्जन र चट्याङ्गसहित हल्का वर्षा र हिमपात हुन सक्ने महाशाखाले जनाएको छ। तराईका केही स्थानहरूमा बिहान हुस्सु लागे पनि दिउँसो आंशिक बादल लाग्नेछ।
रातिको समयमा पनि कोशी, बागमती, गण्डकी र लुम्बिनीका पहाडी तथा हिमाली भेगमा बादल लाग्ने क्रम जारी रहनेछ। कोशी र गण्डकीका थोरै स्थान तथा बागमतीका एक-दुई स्थानमा मेघगर्जनसहित हल्का वर्षा र हिमपातको सम्भावना रहेको छ। तराईका थोरै स्थानहरूमा राति तुवाँलो लाग्न सक्ने देखिएको छ। पहाडी क्षेत्रमा यात्रा गर्दा र बाहिरी काममा निस्कँदा चट्याङ्ग र वर्षाको जोखिमलाई मध्यनजर गर्दै सतर्कता अपनाउनु पर्नेछ।
