काठमाडौँ । हाल नेपालमा पश्चिमी न्यून चापीय प्रणाली र स्थानीय वायुको संयुक्त प्रभाव रहेको मौसम पूर्वानुमान महाशाखाले जनाएको छ। यस मौसमी प्रणालीका कारण कर्णाली, सुदूरपश्चिम, गण्डकी र लुम्बिनी प्रदेशका पहाडी तथा हिमाली भूभागमा साधारणतया बदली रहेको छ भने कोशी र बागमती प्रदेशका पहाडी क्षेत्रमा आंशिक बदली देखिएको छ। देशका अन्य बाँकी भूभागमा भने हाल मौसम मुख्यतया सफा रहेको छ।
आज दिउँसो देशभरका अधिकांश क्षेत्रमा बादल लाग्ने प्रक्षेपण गरिएको छ। महाशाखाका अनुसार कर्णाली र सुदूरपश्चिम प्रदेशका धेरै स्थानहरूमा चट्याङ्ग र असिनासहित मध्यम वर्षाको सम्भावना छ। साथै गण्डकी, लुम्बिनी र कोशी प्रदेशका पहाडी तथा हिमाली भूभागका केही स्थानहरूमा पनि वर्षा र हिमपात हुन सक्नेछ। विशेष गरी कर्णाली र सुदूरपश्चिम प्रदेशका उच्च पहाडी तथा हिमाली एक–दुई स्थानमा भारी वर्षासहित हिमपातको सम्भावना रहेकाले उच्च सतर्कता अपनाउन आग्रह गरिएको छ।
आज राति पनि देशभरको मौसममा बदली रहनेछ। कर्णाली, सुदूरपश्चिम र गण्डकी प्रदेशका धेरै स्थानहरू तथा बाँकी प्रदेशका केही स्थानहरूमा चट्याङ्ग र असिनासहित मध्यम वर्षाको सम्भावना रहेको महाशाखाले बुलेटिनमार्फत जानकारी दिएको छ। प्रि-मनसुनको समय नजिकिँदै गर्दा स्थानीय वायु र पश्चिमी प्रणाली सक्रिय हुँदा देशभरिकै तापक्रम र जनजीवनमा प्रभाव पर्न सक्ने देखिएको छ।
मौसमविद्हरूले वर्षा, चट्याङ्ग र असिनाका कारण हुन सक्ने जोखिमबाट बच्न आवश्यक पूर्वतयारी गर्न सुझाव दिएका छन्। विशेष गरी हिमाली क्षेत्रमा हुने भारी हिमपातले पदयात्रा र यातायातमा अवरोध पुर्याउन सक्ने भएकाले पर्यटक र स्थानीय बासिन्दालाई सचेत रहन भनिएको छ। पहाडी भेगमा असिनाले हिउँदे बालीमा क्षति पुर्याउन सक्ने हुनाले किसानहरूलाई समेत सुरक्षित रहन अपिल गरिएको छ।
