काठमाडौँ । हाल नेपालमा पश्चिमी वायुका साथै स्थानीय वायुको आंशिक प्रभाव रहेको मौसम पूर्वानुमान महाशाखाले जनाएको छ। यस मौसमी प्रणालीका कारण हाल कोशी र गण्डकी प्रदेशका पहाडी तथा हिमाली भू-भागका साथै बागमती प्रदेशको हिमाली क्षेत्रमा साधारणतया बदली रहेको छ। अन्य पहाडी र हिमाली भू-भागमा आंशिक बदली देखिए पनि तराईका क्षेत्रमा भने मौसम मुख्यतया सफा रहेको छ।
महाशाखाका अनुसार आज दिउँसो देशको हिमाली भू-भागमा साधारणतया बदली रहनेछ भने पहाडी क्षेत्रमा आंशिक बदली हुनेछ। विशेष गरी कोशी, बागमती र गण्डकी प्रदेशका हिमाली भू-भागका थोरै स्थानहरूमा मेघगर्जन र चट्याङ्गसहित मध्यम वर्षाको सम्भावना रहेको छ। साथै, देशका अन्य पहाडी र हिमाली भू-भागका एक–दुई स्थानमा हल्का वर्षा र हिमपात हुन सक्ने पूर्वानुमान गरिएको छ। तराईका जिल्लाहरूमा भने आज दिउँसो पनि मौसम सफा नै रहनेछ।
आज राति देशभरको मौसममा आंशिकदेखि साधारण बदली रहनेछ। हिमाली भू-भागमा साधारणतया बदली रहने र पहाडी तथा तराईका क्षेत्रमा आंशिक बदली हुने महाशाखाले जनाएको छ। कोशी र गण्डकी प्रदेशका पहाडी तथा हिमाली भू-भागका साथै अन्य हिमाली क्षेत्रका एक–दुई स्थानमा चट्याङ्गसहित हल्का वर्षा र हिमपातको सम्भावना रहेको बुलेटिनमा उल्लेख छ।
प्रि-मनसुनको समय नजिकिँदै गर्दा स्थानीय वायु सक्रिय हुने हुनाले चट्याङ्ग र आकस्मिक वर्षाको जोखिम रहन सक्ने भन्दै महाशाखाले सतर्कता अपनाउन सर्वसाधारणलाई आग्रह गरेको छ। पदयात्रा र खुला क्षेत्रमा गरिने कामहरूमा मौसमको अवस्था बुझेर मात्र अघि बढ्न सुझाव दिइएको छ।
