काठमाडौँ । राष्ट्रपति रामचन्द्र पौडेलले संघीय संसद्को दुवै सदन (प्रतिनिधिसभा र राष्ट्रिय सभा) को अधिवेशन आह्वान गर्नुभएको छ। मन्त्रिपरिषद्को सिफारिसमा राष्ट्रपति पौडेलले आगामी चैत १९ गते बिहीबार दिउँसो २:०० बजेका लागि संसद्को बैठक बोलाउनुभएको हो।
नेपालको संविधानको धारा ९३ को उपधारा (१) बमोजिम राष्ट्रपति पौडेलले नयाँ बानेश्वरस्थित संघीय संसद् भवनमा अधिवेशन आह्वान गर्नुभएको राष्ट्रपति कार्यालयका प्रवक्ता रितेशकुमार शाक्यले सोमबार जारी गर्नुभएको विज्ञप्तिमा उल्लेख छ। सोमबार दिउँसो प्रधानमन्त्री बालेन्द्र शाहको अध्यक्षतामा बसेको मन्त्रिपरिषद् बैठकले संसद् अधिवेशन आह्वानका लागि राष्ट्रपतिसमक्ष सिफारिस गर्ने निर्णय गरेको थियो।
सरकारको उक्त सिफारिस लगत्तै राष्ट्रपति कार्यालयले एक घण्टाभित्रै अधिवेशन आह्वान गरेको हो। फागुन २१ गते सम्पन्न संसदीय निर्वाचनपछि गठन भएको नयाँ प्रतिनिधिसभाको यो पहिलो अधिवेशन हुनेछ। निर्वाचनमा राष्ट्रिय स्वतन्त्र पार्टी (रास्वपा) १८२ सिटसहित ठूलो दल बनेपछि बालेन्द्र शाहको नेतृत्वमा नयाँ सरकार गठन भएको छ।
यस अधिवेशनमा नयाँ सदस्यहरूको शपथ ग्रहणपछिको कार्यसूची, सभामुख र उपसभामुखको निर्वाचन तथा सरकारको नीति तथा कार्यक्रम लगायतका महत्वपूर्ण विषयमा छलफल हुने अपेक्षा गरिएको छ। ‘जेनजी’ (Gen-Z) आन्दोलनपछिको बदलिएको राजनीतिक परिस्थिति र सुशासनका लागि सरकारले ल्याउन लागेका नयाँ कानुनहरूबारे पनि यसै अधिवेशनमा घनीभूत छलफल हुने सम्भावना छ।
