काठमाडौँ । प्रतिनिधिसभा सञ्चालन नियमावली मस्यौदा समितिले बिहीबारदेखि नियमावलीमा संशोधन गर्नुपर्ने बुँदाहरूमाथि औपचारिक छलफल सुरु गर्ने भएको छ। बुधबार सिंहदरबारमा बसेको समितिको बैठकले नयाँ नियमावली तर्जुमाका लागि भोलिदेखि नियमित रूपमा संशोधनका विषयमा केन्द्रित हुने सहमति गरेको हो।

१५ सदस्यीय यस समितिको नेतृत्व राष्ट्रिय स्वतन्त्र पार्टीका सांसद गणेश पराजुलीले गरिरहनुभएको छ। बुधबारको बैठकमा सभापति पराजुलीले विद्यमान नियमावलीको परिच्छेद १ देखि ८ सम्म वाचन गरेर सुनाउनुभएको थियो। बैठकमा सहभागी नेपाली कांग्रेसका सांसद निश्कल राईका अनुसार, सभापतिले ती परिच्छेदहरूमा आवश्यक परिमार्जन वा संशोधनका बुँदाहरू भए बिहीबारको बैठकमा पेस गर्न सदस्यहरूलाई निर्देशन दिनुभएको छ।

समितिमा निश्कल राईसहित ओजश्वी शेरचन, ऐनबहादुर महर, खगेन्द्र सुनार, खुस्बु ओली, गजला समिम मिकरानी, तपेश्वर यादव, ध्रुवराज राई, निशा डाँगी, बलावती शर्मा, मधु चौलागाईं, यज्ञमणि न्यौपाने, रेखाकुमारी यादव, र सुलभ खरेल सदस्य रहेका छन्।

‘जेनजी’ (Gen-Z) आन्दोलनपछिको राजनीतिक परिवेशमा संसद्लाई अझ बढी पारदर्शी, उत्तरदायी र प्रविधिमैत्री बनाउन नयाँ नियमावलीले महत्त्वपूर्ण भूमिका खेल्ने अपेक्षा गरिएको छ। विशेष गरी नियमावलीमा सांसदहरूको उपस्थिति, शून्य र विशेष समयको प्रभावकारिता, र संसदीय समितिहरूको कार्यक्षेत्रका विषयमा नयाँ व्यवस्थाहरू समेट्न सांसदहरूले गृहकार्य सुरु गरेका छन्। बालेन्द्र शाह नेतृत्वको सरकारले संसद्लाई बिजनेस दिने तयारी गरिरहँदा नियमावली मस्यौदाको कामलाई समितिले तीव्रता दिएको हो।