काठमाडौँ । हाल नेपालमा स्थानीय वायु, पश्चिमी वायुका साथै न्यून चापीय प्रणालीको सक्रिय प्रभाव रहँदा देशका विभिन्न भू-भागमा मौसमी विविधता देखिएको छ। मौसम पूर्वानुमान महाशाखाका अनुसार आज २०८३ जेठ ११ गते सोमबार पूर्वी र मध्य नेपालमा वर्षा तथा हिमपातको सम्भावना रहँदा पश्चिम तराईमा भने अत्यधिक गर्मी (लू) को प्रकोप कायमै रहने देखिन्छ।
आज दिउँसो कोशी, बागमती र गण्डकी प्रदेशमा साधारणतया बादल लाग्नेछ। मधेश प्रदेश लगायत बाँकी प्रदेशको हिमाली तथा पहाडी भू-भागमा आंशिक बदली रहनेछ भने बाँकी तराई क्षेत्रमा मौसम मुख्यतया सफा रहने महाशाखाले जनाएको छ। दिउँसो कोशी, बागमती र गण्डकी प्रदेशका केही स्थानहरूमा तथा मधेश प्रदेश लगायत लुम्बिनी, कर्णाली र सुदूरपश्चिम प्रदेशको हिमाली र पहाडी भू-भागका थोरै स्थानहरूमा मेघगर्जन र चट्याङ्गसहित हल्कादेखि मध्यमसम्मको वर्षा र हिमपातको सम्भावना रहेको छ। अर्कोतर्फ, सुदूरपश्चिम र लुम्बिनी प्रदेशका पहाडी भू–भागमा तातो दिन हुने तथा तराई भू–भागमा ‘तातो लहर’ (Heat Wave/लू) चल्ने सम्भावना रहेकाले अत्यधिक गर्मीबाट बच्न आवश्यक सतर्कता अपनाउन महाशाखाले आग्रह गरेको छ।
आज राति कोशी, मधेश, बागमती र गण्डकी प्रदेश लगायत बाँकी हिमाली भू-भागमा साधारणतया बादल लाग्नेछ। बाँकी प्रदेशको पहाडी भू-भागमा आंशिक बदली रहनेछ भने बाँकी तराई भू-भागमा मौसम मुख्यतया सफा रहनेछ। रातिको समयमा पनि कोशी, बागमती र गण्डकी प्रदेशका केही स्थानहरूमा तथा मधेश प्रदेश लगायत लुम्बिनी, कर्णाली र सुदूरपश्चिम प्रदेशको हिमाली र पहाडी भू-भागका थोरै स्थानहरूमा मेघगर्जन र चट्याङ्गसहित मध्यमसम्म वर्षा र हिमपातको सम्भावना रहेको महाशाखाको बुलेटिनमा उल्लेख छ। मौसममा आउने यस्तो उतारचढाव, चट्याङ्ग र पश्चिम तराईमा चल्ने तातो लहरलाई मध्यनजर गर्दै आवश्यक पूर्वतयारी अपनाउन मौसमविद्हरूले सुझाव दिएका छन्।
