काठमाडौँ । साफ महिला च्याम्पियनसिप २०२६ अन्तर्गत नेपालले आज सोमबार आफ्नो पहिलो खेलमा भुटानको सामना गर्दै प्रतियोगिताको सुरुआत गर्दै छ। भारतको गोवास्थित जवाहरलाल नेहरू रङ्गशालामा हुने यो खेल नेपाली समयानुसार दिउँसो पौने ५ बजे सुरु हुने तय भएको छ। दक्षिण एसियाली महिला फुटबलकै प्रतिष्ठित यस प्रतियोगितामा सुखद सुरुवात गर्ने रणनीतिका साथ दुवै टोली मैदान उत्रने तयारीमा छन्।
नेपाल र भुटान प्रतियोगिताको समूह ‘ए’ मा रहेका छन् र यी दुई टोलीबीचको यो भिडन्त समूह चरणको पहिलो खेल हो। साफ महिला च्याम्पियनसिपको इतिहासमा नेपाल बलियो टोली मानिए पनि अहिलेसम्म ६ पटक उपविजेतामै सीमित हुनु परेको छ। यस पटक भने उपविजेताको इतिहासलाई बदल्दै ऐतिहासिक रूपमा उपाधि चुम्ने लक्ष्यसहित नेपाली महिला टोली मैदानमा होमिएको छ।
यसअघिका संस्करणहरूमा नेपालले भुटानमाथि सहज जित निकाल्दै आएको भए पनि पछिल्लो समय भुटानी महिला फुटबल टोलीको प्रदर्शनमा निकै सुधार आएकाले खेल प्रतिस्पर्धात्मक हुने अनुमान गरिएको छ। समूह ‘ए’ मा रहेका दुवै टोलीका लागि सेमिफाइनल यात्रा सहज बनाउन आजको खेलको नतिजा निकै महत्त्वपूर्ण मानिएको छ। नेपाली टोलीका मुख्य प्रशिक्षक र खेलाडीहरूले पहिलो खेलबाटै स्पष्ट ३ अङ्क जोड्ने दाबी गरेका छन्।
