काठमाडौँ । हाल नेपालमा स्थानीय वायु, पश्चिमी वायुका साथै न्यून चापीय प्रणालीको संयुक्त प्रभाव कायम रहँदा देशको मौसमी प्रणालीमा उल्लेखनीय फेरबदल भइरहेको छ। मौसम पूर्वानुमान महाशाखाका अनुसार आज २०८३ जेठ १२ गते मंगलबार देशका विभिन्न भागमा चट्याङ्ग, वर्षा, हिमपात, हावाहुरी र अत्यधिक गर्मीको बहुआयामिक प्रभाव रहने सम्भावना छ।
आज दिउँसो कोशी, बागमती र गण्डकी प्रदेश लगायत बाँकी हिमाली र पहाडी भू-भागमा साधारणतया बादल लाग्नेछ भने बाँकी तराई भू-भागमा आंशिक बदली रहनेछ। दिउँसो कोशी, बागमती र गण्डकी प्रदेशका हिमाली तथा पहाडी भू-भागका केही स्थानहरूमा तथा मधेश प्रदेश लगायत कोशी, बागमती र गण्डकी प्रदेशका तराई क्षेत्रमा मेघगर्जन र चट्याङ्गसहित हल्कादेखि मध्यमसम्मको वर्षा र हिमपातको सम्भावना रहेको छ। यसैगरी, लुम्बिनी, कर्णाली र सुदूरपश्चिम प्रदेशको हिमाली र पहाडी भू-भागका थोरै स्थानहरूमा तथा लुम्बिनी प्रदेशको तराई भू-भागका एक-दुई स्थानमा चट्याङ्गसहित हल्का वर्षा हुन सक्ने महाशाखाले जनाएको छ।
मौसमविद्हरूका अनुसार आज पहाडी र पूर्वी क्षेत्रमा वर्षा र हिमपातको जोखिम रहँदा सुदूरपश्चिम र लुम्बिनी प्रदेशका तराई तथा पहाडी भू–भागमा भने अत्यधिक गर्मी भई ‘तातो दिन’ (Hot Day) हुने सम्भावना छ। यस्तै, मधेश प्रदेश लगायत कोशी, बागमती र गण्डकी प्रदेशका तराई र पहाडी भू–भागका थोरै स्थानहरूमा तीव्र गतिको हावाहुरी चल्ने सम्भावना रहेकाले आवश्यक सतर्कता अपनाउन महाशाखाले विशेष अनुरोध गरेको छ।
आज राति कोशी, मधेश, बागमती र गण्डकी प्रदेश लगायत बाँकी हिमाली भू-भागमा साधारणतया बादल लाग्नेछ। बाँकी पहाडी भू-भागमा आंशिक बदली रहनेछ भने बाँकी तराई भू-भागमा मौसम मुख्यतया सफा रहनेछ। रातिको समयमा कोशी र मधेश प्रदेशका केही स्थानहरूमा तथा बागमती र गण्डकी प्रदेशका थोरै स्थानहरूमा मध्यमसम्म वर्षा र हिमपातको सम्भावना रहेको छ। यस्तै, लुम्बिनी र कर्णाली प्रदेशको हिमाली तथा पहाडी भू-भाग र सुदूरपश्चिम प्रदेशको हिमाली भू-भागको एक-दुई स्थानमा मेघगर्जन र चट्याङ्गसहित हल्का वर्षा र हिमपातको सम्भावना रहेकाले रातको समयमा पनि सतर्क रहन मौसम पूर्वानुमान महाशाखाको बुलेटिनमा उल्लेख छ।
