काठमाडौँ । हाल नेपालमा स्थानीय वायु, पश्चिमी वायुका साथै देशको पूर्वी भू-भाग नजिक विकसित भएको न्यून चापीय प्रणालीको संयुक्त प्रभाव कायम रहेको छ। मौसम पूर्वानुमान महाशाखाका अनुसार यो मौसमी प्रणालीको सक्रियताका कारण देशका पूर्वी तथा मध्य क्षेत्रहरूमा वर्षा र हिमपातको जोखिम रहँदा सुदूरपश्चिम र लुम्बिनी प्रदेशका रैथाने क्षेत्रमा भने अत्यधिक गर्मीको सामना गर्नुपर्ने स्थिति छ। आज २०८३ जेठ १३ गते बुधबार पनि देशको मौसममा यस्तै दोहोरो चरित्र देखिने महाशाखाले जनाएको छ।

आज दिउँसो कोशी, मधेश, बागमती र गण्डकी प्रदेशमा साधारणतया बादल लाग्नेछ। बाँकी हिमाली तथा पहाडी भू-भागमा आंशिक बदली रहनेछ भने बाँकी तराई क्षेत्रमा मौसम मुख्यतया सफा रहनेछ। दिउँसो कोशी र मधेश प्रदेश लगायत बागमती र गण्डकी प्रदेशका हिमाली तथा पहाडी भू-भागका केही स्थानहरूमा, लुम्बिनी प्रदेशको हिमाली तथा पहाडी भू-भागका थोरै स्थानहरूमा, बागमती र गण्डकी प्रदेशका तराईका भू-भागहरूका साथै कर्णाली र सुदूरपश्चिम प्रदेशको हिमाली र पहाडी भू-भागका एक-दुई स्थानमा मेघगर्जन र चट्याङ्गसहित हल्कादेखि मध्यमसम्मको वर्षा र उच्च हिमाली भेगमा हिमपातको सम्भावना रहेको छ। पूर्वी र मध्य नेपालमा यस्तो मौसमी सक्रियता रहँदा सुदूरपश्चिम र लुम्बिनी प्रदेशका तराई भू–भागमा भने अत्यधिक गर्मीका कारण ‘तातो दिन’ (Hot Day) हुने सम्भावना छ।

आज राति कोशी, बागमती र गण्डकी प्रदेशमा साधारणतया बादल लाग्नेछ। मधेश प्रदेश तथा बाँकी हिमाली र पहाडी भू-भागमा आंशिक बदली रहनेछ भने बाँकी तराई भू-भागमा मौसम मुख्यतया सफा रहनेछ। रातिको समयमा कोशी, बागमती र गण्डकी प्रदेशका थोरै स्थानहरूमा तथा मधेश प्रदेश लगायत लुम्बिनी प्रदेशका हिमाली र पहाडी भू-भागका एक-दुई स्थानमा मेघगर्जन र चट्याङ्गसहित हल्का वर्षा र हिमपातको सम्भावना रहेको महाशाखाको बुलेटिनमा उल्लेख छ। मौसमविद्हरूले मेघगर्जन, चट्याङ्ग र उच्च पहाडी क्षेत्रको हिमपातका साथै पश्चिम नेपालमा बढ्दो गर्मीका कारण हुनसक्ने स्वास्थ्य जोखिमबाट बच्न आवश्यक सतर्कता अपनाउन सबैमा आग्रह गरेका छन्।