काठमाडौँ । हाल नेपालमा उपल्लो वायुमण्डलमा रहेको पश्चिमी न्यून चापीय रेखा, स्थानीय वायु तथा पूर्वीय वायुको आंशिक प्रभाव रहेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार यी मौसमी प्रणालीहरूको संयुक्त असरका कारण आज देशभरिकै मौसममा आंशिकदेखि साधारणतया बदली रही सातै प्रदेशमा वर्षाको सम्भावना रहेको छ।
आज ३ असार बुधबार दिउँसो देशको हिमाली र पहाडी भू-भागमा साधारणतया बादल लाग्नेछ भने कोशी, मधेस, बागमती र गण्डकी प्रदेशका तराई क्षेत्रमा आंशिक बदली हुनेछ। यो अवधिमा कोशी, बागमती र गण्डकी प्रदेशका हिमाली तथा पहाडी भू-भागका थोरै स्थानहरूमा र लुम्बिनी, कर्णाली र सुदूरपश्चिम प्रदेशका हिमाली तथा पहाडी भू-भागका एक-दुई स्थानमा मेघगर्जन र चट्याङ्गसहित मध्यम वर्षाको सम्भावना छ। साथै, कोशी प्रदेशको तराईका थोरै स्थानहरू र मधेस प्रदेशको पनि एक-दुई स्थानमा चट्याङ्गसहित पानी पर्ने अनुमान गरिएको छ।
रातिको समयमा पनि कोशी र गण्डकी प्रदेशका हिमाली तथा पहाडी भू-भागका थोरै स्थानहरूमा र बागमती प्रदेशका पहाडी क्षेत्रका एक-दुई स्थानमा चट्याङ्गसहित हल्कादेखि मध्यम वर्षाको सम्भावना कायमै रहनेछ। पूर्वी र पहाडी क्षेत्रमा वर्षाको वातावरण बन्दा लुम्बिनी र सुदूरपश्चिम प्रदेशका तराई भू-भागका केही स्थानहरूमा भने अत्यधिक गर्मी बढ्ने र तातो दिन (लू) चल्न सक्ने भएकाले महाशाखाले आवश्यक सतर्कता अपनाउन विशेष आग्रह गरेको छ।
