काठमाडौँ । जल तथा मौसम पूर्वानुमान महाशाखाका अनुसार आज २०८३ असार ५ गते शुक्रबार देशका विभिन्न भू-भागमा वर्षा, हिमपात र तातो लहर (लू) को मिश्रित प्रभाव देखिने भएको छ।
दिउँसो कोशी, बागमती, गण्डकी, कर्णाली र सुदूरपश्चिम प्रदेशका हिमाली तथा पहाडी भू-भाग, लुम्बिनी प्रदेशको हिमाली भू-भाग र कोशी प्रदेशको तराई क्षेत्रमा साधारणतया बादल लाग्नेछ। यस्तै, लुम्बिनीको पहाडी र मधेस प्रदेशको तराई भू-भागमा आंशिक बदली रही अन्य तराई क्षेत्रमा मौसम मुख्यतया सफा रहने महाशाखाले जनाएको छ। कोशी प्रदेशका हिमाली र पहाडी भू-भागका केही स्थान तथा बागमती र गण्डकीका थोरै स्थानहरूमा मेघगर्जन र चट्याङ्गसहित मध्यमसम्मको वर्षा वा हिमपातको सम्भावना छ। साथै, लुम्बिनी, कर्णाली र सुदूरपश्चिमका हिमाली तथा पहाडी क्षेत्रका एक-दुई स्थानमा पनि वर्षा र हिमपात हुन सक्नेछ। तराईतर्फ कोशीका थोरै र मधेस प्रदेशका एक-दुई स्थानमा मेघगर्जनसहित मध्यम वर्षाको अनुमान गरिएको छ।
पहाडी क्षेत्रमा वर्षा र हिमपातको सम्भावना रहँदा तराईका केही जिल्लाहरूमा भने गर्मी अत्यधिक बढ्नेछ। लुम्बिनी र सुदूरपश्चिम प्रदेशका तराई भू-भागका केही स्थानहरूमा तातो लहर (हिट वेभ) चल्ने तथा बागमती र गण्डकी प्रदेशका तराई क्षेत्रमा तातो दिन हुने सम्भावना रहेकाले आवश्यक सतर्कता अपनाउन महाशाखाले अनुरोध गरेको छ।
रातिको समयमा कोशी, बागमती र गण्डकी प्रदेशका हिमाली तथा पहाडी भू-भागमा साधारणतया बदली रहनेछ भने कोशीको तराई र अन्य पहाडी क्षेत्रमा आंशिक बदली हुनेछ। राति कोशी, बागमती र गण्डकीका थोरै स्थानहरूमा तथा कर्णाली र सुदूरपश्चिमका हिमाली भू-भागका एक-दुई स्थानमा मेघगर्जन र चट्याङ्गसहित मध्यम वर्षा वा हिमपातको सम्भावना रहेको छ। कोशी प्रदेशको तराई क्षेत्रका थोरै स्थानहरूमा समेत राति मेघगर्जनसहित मध्यम वर्षाको सम्भावना रहेको मौसम पूर्वानुमान महाशाखाले जनाएको छ।
