काठमाडौँ । जल तथा मौसम पूर्वानुमान महाशाखाका अनुसार शुक्रबार देशभर मनसुनी वायुको सक्रिय प्रभावका कारण अधिकांश भू-भागमा पूर्ण बदली रहनेछ। देशका धेरैजसो स्थानमा मेघगर्जन र चट्याङ्गसहित वर्षा हुनुका साथै रातिको समयमा विभिन्न प्रदेशमा धेरै भारी वर्षाको सम्भावना रहेकाले विशेष सतर्कता अपनाउन आग्रह गरिएको छ।
आज दिउँसो देशभर अधिकांश बादल लाग्नेछ। देशका पहाडी भू-भागका धेरै स्थानहरूमा तथा हिमाली भेगका केही स्थानहरूमा मेघगर्जन र चट्याङ्गसहित मध्यम वर्षा र हिमपातको सम्भावना रहेको छ। त्यस्तै, बागमती, गण्डकी, लुम्बिनी र सुदूरपश्चिम प्रदेशका तराईका केही स्थान तथा मधेश र कोशी प्रदेशका तराई क्षेत्रका थोरै स्थानमा मध्यम वर्षाको पूर्वानुमान गरिएको छ।
रातिको समयमा पनि देशभर अधिकांश बादल लाग्नेछ। कोशी, बागमती, गण्डकी र लुम्बिनी प्रदेशका पहाडी भू-भागका धेरै स्थान तथा तराईका धेरैजसो क्षेत्रमा मध्यम वर्षाको सम्भावना छ। महाशाखाका अनुसार राति कोशी, बागमती, गण्डकी र लुम्बिनी प्रदेशको पहाडी भू-भागका थोरै स्थानमा तथा कर्णाली र सुदूरपश्चिम प्रदेशका पहाडी भू-भागका एक-दुई स्थानमा भारीदेखि धेरै भारी वर्षाको सम्भावना छ। साथै मधेश प्रदेशसहित बागमती, गण्डकी, लुम्बिनी र सुदूरपश्चिम प्रदेशका तराई क्षेत्रका एक-दुई स्थानमा समेत धेरै भारी वर्षा हुन सक्ने भएकाले आकस्मिक बाढी, पहिरो र डुबानको जोखिमबाट बच्न नदी तटीय र भिरालो क्षेत्रका बासिन्दालाई उच्च सतर्कता अपनाउन भनिएको छ।
