काठमाडौँ । मुलुकभर मनसुनी वायुको प्रभाव सक्रिय रहँदा आज (आइतबार) देशभरको मौसममा उल्लेख्य बदलाब आउने जल तथा मौसम विज्ञान विभागले जनाएको छ। देशभर साधारणतया बादल लाग्नेछ भने पहाडी तथा तराई भू-भागका अधिकांश स्थानमा वर्षा र हिमाली क्षेत्रमा हिमपातको सम्भावना रहेको छ।
आज दिउँसो देशका हिमाली भू-भागका केही स्थानमा मध्यमसम्मको वर्षा तथा हिमपातको सम्भावना छ। पहाडी भू-भागका धेरै स्थानमा र तराई भू-भागका केही स्थानमा मध्यमसम्मको वर्षा हुन सक्नेछ। विशेष गरी कोशी, बागमती, गण्डकी, लुम्बिनी र कर्णाली प्रदेशका पहाडी भू-भागका एक-दुई स्थानमा भारी वर्षाको सम्भावना रहेको हुनाले आवश्यक सतर्कता अपनाउन मौसमविद्हरूले आग्रह गरेका छन्।
त्यसैगरी आज राति वर्षाको दायरा अझ फराकिलो र तीव्र हुने पूर्वानुमान गरिएको छ। रातिको समयमा कोशी, बागमती र गण्डकी प्रदेशका हिमाली भू-भागका केही स्थानमा तथा लुम्बिनी, कर्णाली र सुदूरपश्चिमका थोरै स्थानमा हिमपात र वर्षा हुनेछ। यस्तै, कोशी, बागमती, गण्डकी र लुम्बिनी प्रदेशका पहाडी तथा तराईका धेरै स्थानमा मध्यमसम्मको वर्षा हुनेछ।
रातिको समयमा कोशी, बागमती र गण्डकी प्रदेशका हिमाली, पहाडी र तराई भू-भागका साथै मधेश प्रदेश र लुम्बिनी प्रदेशका तराई भू-भागका थोरै स्थानमा भारी तथा एक-दुई स्थानमा धेरै भारी वर्षाको उच्च सम्भावना रहेको छ। लगातारको वर्षाका कारण गेग्रान बहाव, बाढी, पहिरो तथा डुबानको जोखिम रहने भएकाले सर्वसाधारणलाई सचेत रहन र पूर्वतयारी अपनाउन अपिल गरिएको छ।
