बुटवल । पश्चिम नवलपरासीको सुस्ता स्थित विवादित सीमा क्षेत्रमा निर्मित अस्थायी बाँध भारतीय सुरक्षा बलले भत्काएपछि उत्पन्न तनावलाई साम्य पार्न सुरक्षा निकाय परिचालन गरिएको छ। सुस्ता गाउँपालिका–५ स्थित थारु टोलमा वर्षायामको भेल रोक्न स्थानीयवासीले शनिबार निर्माण गरेको १३२ मिटर लामो माटोको कच्ची बाँध आइतबार भारतीय सशस्त्र सीमा बल (एसएसबी) का जवानहरूले भत्काएपछि विवाद चर्किएको हो।
प्रत्यक्षदर्शी तथा स्थानीय अभियानकर्ताहरूका अनुसार भारतीय सुरक्षाकर्मीहरू दुई देशबिच सीमा मानिँदै आएको सिमलको रूखभन्दा करिब ३ सय मिटर नेपालतर्फ प्रवेश गरी सादा पोसाक तथा हतियारसहित निर्माणस्थल पुगेका थिए। नेपाली भूमिमा निर्मित संरचना भत्काइएपछि क्रुद्ध बनेका स्थानीय नागरिकहरू तत्काल प्रतिवादमा उत्रिएका थिए। यसअघि पनि वर्षाको भेल नियन्त्रणका लागि बनाउन लागिएको संरचनामा भारतीय पक्षले अवरोध पुर्याउँदै आएको थियो।
घटनापछि उत्पन्न विवाद र सुरक्षा स्थिति नियन्त्रणमा लिन क्षेत्रमा सशस्त्र प्रहरी बल परिचालन गरिएको छ। जिल्ला प्रशासन कार्यालय नवलपरासीका प्रमुख जिल्ला अधिकारीले सीमा क्षेत्रमा माटोको अस्थायी बाँध निर्माणका विषयमा विवाद उत्पन्न भएको पुष्टि गर्दै थप मुठभेड हुन नदिन सुरक्षाकर्मी खटाइएको र हाल स्थिति नियन्त्रणमा रहेको जानकारी दिएका छन्। सुस्ता दशकौँदेखि दुई देशबिच सुल्झिन बाँकी संवेदनशील सीमा क्षेत्र मानिन्छ।
