एजेन्सी । क्यानाडाको पश्चिमी प्रान्त ब्रिटिस कोलम्बियामा भएको गोलीकाण्डमा परी ९ जनाको मृत्यु भएको छ भने २५ जना घाइते भएका छन्। प्रहरीका अनुसार उक्त दुखद घटना टम्बलर रिज माध्यमिक विद्यालय र नजिकैको एक घरमा भएको हो। आक्रमणमा मारिनेहरूमध्ये ६ जनाको शव विद्यालयभित्रै फेला परेको थियो भने सातौँ व्यक्तिको अस्पताल लैजाँदै गर्दा बाटोमै मृत्यु भएको अधिकारीहरूले जनाएका छन्।
घटनामा संलग्न रहेको आशंका गरिएको व्यक्तिको शव पनि विद्यालय परिसरमै फेला परेको छ। प्रहरीका अनुसार ती व्यक्तिले आफैँलाई गोली हानी आत्महत्या गरेको प्रारम्भिक अनुसन्धानले देखाएको छ। यसैबीच, विद्यालय नजिकैको एक घरमा थप दुई जना मृत अवस्थामा भेटिएका छन्। प्रहरीले विद्यालय र घरमा भएका दुवै गोलीकाण्ड एकआपसमा सम्बन्धित हुन सक्ने विश्वास गरे पनि यसलाई आधिकारिक रूपमा पुष्टि गरिसकेको छैन।
अधिकारीहरूले आक्रमणकारीको पहिचान भइसकेको बताए पनि उनको नाम र लिङ्ग भने अझै सार्वजनिक गरेका छैनन्। यद्यपि, घटना लगत्तै जारी गरिएको ‘सेल्टर-इन-प्लेस’ (सुरक्षित स्थानमा बस्ने) सूचनामा संदिग्ध व्यक्तिलाई ‘ब्राउन कपाल भएकी र पहिरन (ड्रेस) लगाएकी महिला’ भनी वर्णन गरिएको थियो। टम्बलर रिज माध्यमिक विद्यालयका एक विद्यार्थीले सञ्चारमाध्यमलाई बताए अनुसार, गोली चल्न थालेपछि उनले आफ्ना सहपाठीहरूसँग मिलेर टेबलहरूले ढोका छेकेर आफूलाई सुरक्षित राखेका थिए।
यस हृदयविदारक घटनाप्रति क्यानाडाका प्रधानमन्त्री मार्क कार्नीले गहिरो दुःख व्यक्त गर्दै आफू ‘मर्माहत’ भएको बताएका छन्।
