काठमाडाैं । आगामी प्रतिनिधि सभा सदस्य निर्वाचनको कार्यतालिका अनुसार आज प्रत्यक्षतर्फ उम्मेदवारी दिएका उम्मेदवारहरूको नामावली प्रकाशन गरिँदै छ। निर्वाचन आयोगका अनुसार, पहिलो हुने निर्वाचित हुने (प्रत्यक्ष) निर्वाचन प्रणालीअन्तर्गत मनोनयन दर्ता गरेका उम्मेदवारहरूको विरोधमा उजुरी दिने समय सकिएसँगै आयोग अब नामावली सार्वजनिक गर्ने तयारीमा जुटेको हो।
मनोनयन दर्ता भएका ३ हजार ४ सय ८६ उम्मेदवारमध्ये कुल ५ जना विरुद्ध उजुरी परेको आयोगले जनाएको छ। उजुरी परेका क्षेत्रहरूमा भक्तपुर, सुनसरी, रौतहट र कैलाली रहेका छन्। यी उजुरीहरूमाथि आवश्यक छानबिन र जाँचबुझ गरी आज साँझ ५ बजेदेखि ७ बजेको बीचमा उम्मेदवारहरूको प्रारम्भिक नामावली सार्वजनिक गर्ने आयोगको योजना छ।
निर्वाचन कार्यतालिका अनुसार भोलि अर्थात् माघ ९ गते थप महत्त्वपूर्ण प्रक्रियाहरू अघि बढ्नेछन्। भोलि दिउँसो १ बजेदेखि ३ बजेसम्ममा उम्मेदवारहरूको अन्तिम नामावली प्रकाशन गरिनेछ। यससँगै निर्वाचनमा प्रतिस्पर्धा गर्ने उम्मेदवारहरूको टुङ्गो लाग्नेछ र चुनावी प्रतिस्पर्धाको चित्र स्पष्ट हुनेछ।
अन्तिम नामावली प्रकाशन भएलगत्तै भोलि नै माघ ९ गते दिउँसो ४ बजेदेखि साँझ ७ बजेसम्म सबै उम्मेदवारहरूलाई निर्वाचन चिह्न प्रदान गरिने कार्यक्रम रहेको छ। चिह्न प्राप्त गरेसँगै उम्मेदवारहरूले औपचारिक रूपमा आ-आफ्नो निर्वाचन क्षेत्रमा चुनावी प्रचारप्रसार र अभियानलाई तीव्रता दिनेछन्।
