काठमाडौँ । हाल नेपालको उपल्लो वायुमण्डलमा उच्च चापीय प्रणालीको प्रभाव रहेको मौसम पूर्वानुमान महाशाखाले जनाएको छ। यस प्रणालीका कारण कोशी, बागमती र गण्डकी प्रदेशका पहाडी तथा हिमाली भू-भागमा अहिले आंशिक बदली रहेको छ।
महाशाखाका अनुसार आज दिउँसो पनि कोशी, बागमती र गण्डकी प्रदेशका पहाडी तथा हिमाली भेगमा आंशिक बादल लाग्ने सम्भावना छ। देशका अन्य भू-भागमा भने मौसम मुख्यतया सफा रहनेछ। तराईका केही स्थानहरूमा दिउँसोको समयमा हुस्सु लाग्न सक्ने देखिएको छ।
आज राति पनि कोशी र गण्डकी प्रदेशका पहाडी तथा हिमाली भू-भागमा आंशिक बदली कायमै रहनेछ। बाँकी क्षेत्रको मौसम भने सफा रहने महाशाखाले जनाएको छ। रातिको समयमा तराईका थोरै स्थानहरूमा तुवाँलो लाग्न सक्ने सम्भावना रहेकाले स्वास्थ्य र यात्रामा सतर्कता अपनाउन आवश्यक छ।
