काठमाडौँ । हाल नेपालमा पश्चिमी न्यून चापीय प्रणालीका साथै स्थानीय वायुको आंशिक प्रभाव रहेको मौसम पूर्वानुमान महाशाखाले जनाएको छ। यस मौसमी प्रणालीको प्रभावले गर्दा हाल सुदूरपश्चिम प्रदेशलगायत देशका पहाडी र हिमाली भू-भागमा साधारणतया बदली रहेको छ।
महाशाखाका अनुसार आज दिउँसो देशको हिमाली भू-भागमा अधिकांश बदली, पहाडी भू-भागमा साधारणतया बदली र तराईका क्षेत्रमा आंशिक बदली रहनेछ। कोशी, बागमती र गण्डकी प्रदेशका पहाडी तथा हिमाली भू-भागका धेरै स्थानहरूमा मध्यम वर्षाको सम्भावना छ। यस्तै, अन्य प्रदेशका पहाडी र हिमाली भू-भागका केही स्थानहरू तथा तराईका थोरै स्थानहरूमा मेघगर्जन, चट्याङ्ग, हावाहुरी र असिनासहित मध्यम वर्षा तथा हिमपात हुन सक्ने पूर्वानुमान गरिएको छ।
आज राति पनि मौसममा उल्लेख्य सुधार हुने देखिँदैन। देशको हिमाली भू-भागमा अधिकांश बदली रहनेछ भने कोशी र मधेस प्रदेशलगायत पहाडी भू-भागमा साधारणतया बदली रहने महाशाखाले जनाएको छ। तराईका भू-भागमा भने आंशिक बदली रहनेछ।
रातिको समयमा कोशी, मधेस, बागमती, गण्डकी र लुम्बिनी प्रदेशका केही स्थानहरूमा तथा कर्णाली र सुदूरपश्चिमका थोरै स्थानमा चट्याङ्ग, हावाहुरी र असिनासहित वर्षाको सम्भावना छ। प्रि-मनसुनको सक्रियतासँगै वायुमण्डल अशान्त रहने हुनाले चट्याङ्ग र हावाहुरीबाट हुन सक्ने क्षति न्यूनीकरण गर्न महाशाखाले विशेष सतर्कता अपनाउन अनुरोध गरेको छ।
