काठमाडौँ । राष्ट्रिय स्वतन्त्र पार्टी (रास्वपा) को केन्द्रीय समितिको बैठकले संसदीय दल गठनको प्रस्ताव सर्वसम्मत रूपमा पारित गरेको छ। पार्टीको केन्द्रीय कार्यालय वनस्थलीमा आज (बिहीबार) दिउँसो ४ बजे बसेको बैठकले उक्त महत्त्वपूर्ण निर्णय गरेको हो।
यस बैठकलगत्तै संसदीय दलको बैठक बसेको थियो, जसले काठमाडौँ महानगरपालिकाका पूर्वप्रमुख बालेन्द्र शाहलाई औपचारिक रूपमा संसदीय दलको नेता चयन गरेको छ। यो निर्णय गत पुस १३ गते रास्वपा सभापति रवि लामिछाने र बालेन्द्र शाहबीच भएको ७ बुँदे सहमति अनुरूप नै गरिएको हो। उक्त सहमतिको बुँदा नं ४ मा लामिछाने पार्टी सभापति रहने र शाहलाई भावी प्रधानमन्त्रीको उम्मेदवार बनाउने उल्लेख थियो।
प्रवक्तासमेत रहनुभएका सांसद मनिष झाका अनुसार, संसदीय दलको बैठकले सर्वसम्मत रूपमा बालेन्द्र शाहलाई दलको नेता छान्ने प्रस्ताव पारित गरेको हो। रास्वपाले फागुन २१ गते सम्पन्न प्रतिनिधिसभा सदस्य निर्वाचनमा स्पष्ट बहुमत ल्याएकाले बालेन्द्र शाह मुलुकको आगामी प्रधानमन्त्री बन्ने सुनिश्चित भएको छ। उहाँले झापा–५ बाट भारी मतान्तरले चुनाव जित्नुभएको थियो।
भोलि (शुक्रबार) बालेन्द्र शाहले प्रधानमन्त्रीको रूपमा पद तथा गोपनीयताको शपथ लिने तयारी गरिएको छ। पार्टीले आजै संसदीय दलको नेता चयनको जानकारी राष्ट्रपति कार्यालयलाई दिनेछ। संविधानको धारा ७६ (१) बमोजिम राष्ट्रपतिले उहाँलाई प्रधानमन्त्रीमा नियुक्त गर्नुहुनेछ। ३५ वर्षीय शाह नेपालको इतिहासमै सबैभन्दा कम उमेरको र पहिलो मधेसी मूलको प्रधानमन्त्री बन्ने क्रममा हुनुहुन्छ।
आजै नवनिर्वाचित सांसदहरूले सिंहदरबारस्थित संघीय संसद् भवनमा पद तथा गोपनीयताको शपथ लिइसकेका छन्, जहाँ विभिन्न परम्परागत पोसाक र मातृभाषामा शपथ लिएर सांस्कृतिक विविधताको सम्मान गरिएको थियो।
