काठमाडौँ । राष्ट्रिय स्वतन्त्र पार्टी (रास्वपा) का उपसभापति डोलप्रसाद (डीपी) अर्यालले प्रतिनिधिसभाको सभामुख पदका लागि आफ्नो मनोनयन दर्ता गराउनुभएको छ। शुक्रबार दिउँसो सिंहदरबारस्थित संघीय संसद् सचिवालय पुगेर उहाँले औपचारिक रूपमा उम्मेदवारी दर्ता गराउनुभएको हो। रास्वपाको संसदीय दलको बैठकले अर्याललाई सभामुखको उम्मेदवार बनाउने निर्णय गरेसँगै उहाँ चुनावी मैदानमा उत्रिनुभएको हो।
अर्यालको प्रस्तावकमा रास्वपा सभापति एवं प्रतिनिधिसभा सदस्य रवि लामिछाने रहनुभएको छ। त्यस्तै, समर्थकहरूमा अर्थमन्त्री डा. स्वर्णिम वाग्ले, कानुन, न्याय तथा संसदीय मामिलामन्त्री सोविता गौतम र भौतिक पूर्वाधार तथा यातायात मन्त्री सुनिल लम्साल रहनुभएको छ। ‘जेनजी’ आन्दोलनपछिको आम निर्वाचनमा रास्वपाले हासिल गरेको अभूतपूर्व जितपछि अर्याललाई संसद्को नेतृत्व गर्ने जिम्मेवारी दिन लागिएको हो।
२७५ सदस्यीय प्रतिनिधिसभामा रास्वपा एक्लैको १८२ सिट रहेको छ, जुन स्पष्ट बहुमत हो। गणितीय हिसाबले अर्याल सभामुखमा निर्वाचित हुने निश्चित जस्तै देखिएको छ। निर्वाचन कार्यतालिका अनुसार सभामुखका लागि आइतबार (चैत २२ गते) मतदान हुनेछ। अर्याल यसअघि पनि प्रतिनिधिसभा सदस्य र श्रम, रोजगार तथा सामाजिक सुरक्षा मन्त्रीका रूपमा कार्य गरिसकेका अनुभवी नेता हुनुहुन्छ।
बालेन्द्र शाह नेतृत्वको सरकार र रास्वपाको बाहुल्य रहेको वर्तमान संसद्मा अर्यालको चयनले विधायीकी प्रक्रियालाई थप गति दिने अपेक्षा गरिएको छ। प्रतिपक्षी दलहरूले सभामुखमा उम्मेदवारी दिने वा नदिने भन्नेबारे अझै स्पष्ट गरिसकेका छैनन्। आइतबारको निर्वाचनपछि अर्यालले विधिवत रूपमा सभामुखको कार्यभार सम्हाल्नुहुनेछ।
