तेहरान । इरानले अमेरिका र इजरायलसँगको जारी युद्ध अन्त्यका लागि प्रस्ताव गरिएको ४५ दिने युद्धविरामलाई औपचारिक रूपमा अस्वीकार गरेको छ। इरानी सरकारी सञ्चारमाध्यम आइआरएनए (IRNA) का अनुसार तेहरानले मध्यस्थकर्ता पाकिस्तानमार्फत १० बुँदे प्रतिक्रिया पठाउँदै अस्थायी युद्धविरामका सट्टा द्वन्द्वको निश्चित र स्थायी अन्त्य हुनुपर्ने अडान राखेको हो।
युद्ध १३औँ दिनमा प्रवेश गरिरहँदा इरानले आफ्ना तीन मुख्य सर्तहरू अघि सारेको छ:
१. इरानी अधिकारको अन्तर्राष्ट्रिय मान्यता।
२. युद्धबाट भएको क्षतिको पूर्ण क्षतिपूर्ति।
३. भविष्यमा पुनः आक्रमण नहुने बलियो ग्यारेन्टी।
यता, अमेरिकी राष्ट्रपति डोनाल्ड ट्रम्पले इरानलाई कडा चेतावनी दिनुभएको छ। ट्रम्पले मङ्गलबारसम्ममा विश्वकै महत्त्वपूर्ण तेल ढुवानी मार्ग ‘हर्मुज घाँटी’ लाई स्वतन्त्र आवागमनका लागि खुला नगरेमा इरानले कल्पना नगरेको भयङ्कर आक्रमणको सामना गर्नुपर्ने बताउनुभएको छ। ह्वाइट हाउसमा पत्रकारहरूसँग बोल्दै ट्रम्पले ४५ दिने युद्धविराम प्रस्तावलाई एउटा ‘विशेष कदम’ तर ‘अपर्याप्त’ भएको टिप्पणी गर्नुभएको छ।
“यदि इरानले मार्ग प्रशस्त गरेन भने उनीहरूले आफ्ना महत्त्वपूर्ण पूर्वाधारहरू ध्वस्त भएको हेर्नुपर्नेछ,” ट्रम्पले भन्नुभयो। हाल अन्तर्राष्ट्रिय मध्यस्थकर्ताहरू इरानलाई वार्ताको टेबलमा ल्याउन प्रयास गरिरहेका छन्, तर इरानको पछिल्लो अडानले मध्यपूर्वको तनाव झन् बढ्ने देखिएको छ। बालेन्द्र शाह नेतृत्वको नेपाल सरकारले पनि यसअघि नै मध्यपूर्वमा रहेका नेपालीहरूको सुरक्षालाई लिएर चासो व्यक्त गरिसकेको छ।
