काठमाडौँ । नेपाली कांग्रेसका सभापति एवं पूर्वप्रधानमन्त्री शेरबहादुर देउवा र उहाँकी पत्नी एवं पूर्वमन्त्री डा. आरजु राणा देउवाविरुद्ध पक्राउ पुर्जी जारी भएको छ। गैरकानुनी सम्पत्ति आर्जन गरेको अभियोगमा अनुसन्धान गरिरहेको सम्पत्ति शुद्धीकरण अनुसन्धान विभागको मागबमोजिम जिल्ला अदालत काठमाडौँले उनीहरूलाई पक्राउ गर्न अनुमति दिएको हो।
उच्च स्रोतका अनुसार अदालतबाट पक्राउ अनुमति प्राप्त भए पनि देउवा दम्पती हाल नेपालमा नभएका कारण पक्राउ गर्न सकिएको छैन। फागुन २१ गतेको निर्वाचनअघि नै स्वास्थ्य उपचारको बहाना बनाएर सिङ्गापुर जानुभएका देउवा दम्पती अहिले हङकङतर्फ लागेको सूचना सार्वजनिक भएको छ।
यसअघि ‘जेनजी’ (Gen-Z) आन्दोलनका क्रममा बुढानीलकण्ठस्थित देउवा निवासमा आक्रोशित प्रदर्शनकारीले आगजनी र तोडफोड गरेका थिए। सो घटनापछि घरभित्र जलेका अवस्थामा ठूलो परिमाणमा नेपाली र विदेशी मुद्राका नोटहरू फेला परेको विवरण बाहिर आएको थियो। उक्त घटनालगत्तै सम्पत्ति शुद्धीकरण विभागले निवासमै पुगेर मुचुल्का उठाएको थियो भने हाल यस प्रकरणको विस्तृत अनुसन्धान नेपाल प्रहरीको केन्द्रीय अनुसन्धान ब्युरो (CIB) ले अगाडि बढाइरहेको छ।
बालेन्द्र शाह नेतृत्वको सरकारले भ्रष्टाचार र गैरकानुनी सम्पत्ति आर्जनमा शून्य सहनशीलताको नीति लिएसँगै पुराना प्रभावशाली नेताहरूमाथि कानुनी फन्दा कसिँदै गएको छ। देउवा दम्पतीलाई स्वदेश फर्काउन इन्टरपोलमार्फत रेड कर्नर नोटिस जारी गर्ने विषयमा समेत गृह मन्त्रालयले आन्तरिक परामर्श सुरु गरेको बुझिएको छ।
