काठमाडौँ । प्रतिनिधिसभाको उपसभामुखको निर्वाचन प्रक्रिया औपचारिक रूपमा सुरु भएको छ। बुधबारको प्रतिनिधिसभा बैठकमा सभामुख डोलप्रसाद (डीपी) अर्यालले उपसभामुखको निर्वाचनका लागि आगामी चैत २७ गतेको मिति तोक्नुभएको हो। सभामुखको निर्देशनलगत्तै सङ्घीय संसद् सचिवालयका सचिव हर्क राईले निर्वाचनसम्बन्धी सूचना प्रकाशित गर्नुभएको छ।
प्रतिनिधिसभा नियमावलीको नियम ७ अनुसार सभामुखले तोकेको दिन र समयमा उपसभामुखको निर्वाचन हुने व्यवस्था छ। सोहीबमोजिम सभामुख अर्यालले निर्वाचनको मिति तय गर्नुभएको हो। संवैधानिक व्यवस्था अनुसार सभामुख र उपसभामुख फरक-फरक लिङ्ग र फरक-फरक दलको हुनुपर्नेछ। सभामुखमा राष्ट्रिय स्वतन्त्र पार्टी (रास्वपा) का अर्याल निर्विरोध निर्वाचित भइसक्नुभएको छ।
२७५ सदस्यीय प्रतिनिधिसभामा रास्वपा १८२ सांसदसहित सहज एकल बहुमतमा छ। अन्य दलहरूमा नेपाली कांग्रेसका ३८, नेकपा एमालेका २५, नेपाली कम्युनिस्ट पार्टीका १७, श्रम संस्कृति पार्टीका ७, र राष्ट्रिय प्रजातन्त्र पार्टीका ५ सांसद छन्। रास्वपा एकल बहुमतमा रहेकाले उपसभामुख कसले पाउने भन्ने निर्णय पूर्ण रूपमा उसकै हातमा छ।
उपसभामुख पदका लागि एमालेबाहेकका अन्य प्रमुख दलहरूले दाबी गरिरहेका छन्। यद्यपि, रास्वपाले अहिलेसम्म कुनै पनि दललाई स्पष्ट ‘ग्रिन सिङ्नल’ दिएको छैन। रास्वपाका नेताहरूले दलहरूसँग छलफल जारी रहेको तर निष्कर्षमा नपुगेको जनाएका छन्। बालेन्द्र शाह नेतृत्वको सरकार र ‘जेनजी’ (Gen-Z) आन्दोलनपछिको नयाँ राजनीतिक परिस्थितिमा उपसभामुखको यो निर्वाचनलाई निकै महत्त्वका साथ हेरिएको छ।
